کیچ: بلوچ اسٹوڈنٹس ایکشن کمیٹی ءِ نیمگ ءَ کہ تربت ءَ شھید واجہ سبا دشتیاری ءِ نام ءَ برجم دارگ بیتگیں دو روچی میڑہ دوشی آسر بیتگ۔
میڑہ ءِ دومی روچ ءَ بساک ءِ پیشگیں سرکماش ڈاکٹر سبیہ بلوچ، انیگیں سرکماش شبیر بلوچ ءُ آدگراں تران کُرتگ،اھوالکاری ءِ بنگپ ءِ سر ءَ اھوالکار کیا کیّا بلوچ ءَ ھم آنلائن تران کُرتگ۔
میڑہ ءِ دومی روچ ءَ نوکی ءُ بلوچی لبزانک ءِ بنگپ ءِ سر ءَ گپ ءُ تران (پینل ڈسکشن) کنگ بیتگ کہ ورنائیں ندکار راشد ھسرت، سالم مجید، رِزوان پاھر ءُ آدگہ مردماں وتی ھیال ءُ لیکہ درشان کُرتگ اَنت۔
میڑہ ءَ بلوچی تامُرانی نامداریں بامرد اھسان دانش کہ ماسی تلیان ءِ نام ءَ زانگ بیت آئی ءَ گوں وتی ھمراھاں وتی ازم پیشداشتگ ءُ مردم وشنود کُرتگ اَنت۔
میڑہ ءَ شائری بھر ءَ بلوچی زبان ءِ شائراں وتی لچہ ونتگ ءُ مردم وشنود کُرتگ اَنت ءُ زیملی بھر ءَ بلوچی زبان ءِ وشتواریں زھیروک گْوش شاکر زامرانی، بلوچی ءُ براھوئی گشندہ ابدُلھالک پرھاد، وھاب بلوچ، نوشین کمبرانی ءُ آدگہ مردماں سوت جتگ ءُ مردم وشنود کُرتگ اَنت۔
میڑہ ءَ ورنایاں ابید جتائیں وانگجاھانی جنک ءُ بچکیں نودربر ءُ جتائیں بھرگاں سیادی داروکیں مردماں بازیں کچ ئِے ءَ بھر زرتگ۔
