آواران:زور بیگواھیں دلجان ءِ کھول ءُ انتزامیہ ءِ میان ءَ گپ ءُ تران سوبین بوتگ۔ کھول ءَ وتی زھرشانی نندانک ءُ آئی گھار ءَ وتی شدکشیں زھرشانی ھلاس کرتگ۔
چہ زھرشانی نندانک ءَ کھول ءَ پریس کانپریس کرتگ ءُ گوشتگ کہ مرچی دلجان ءِ کھول ءِ زھرشانی نندانک ءَ چاردہ روچ سرجم بوتگ، دلجان ھمے سالءِ 12 جون ءَ چہ گس ءَ آوار جنگ ءُ بیگواہ کنگ بوتگ انگت بیگواہ اِنت۔ چہ ایشی ءَ پیش کھول دمگدارءِ کارگس ءِ دیم ءَ زھرشانی ءَ نشتگ گڑا نتزامیہ ءُ ھندی میراں دہ روچ ءِ وھد داتگ ءُ زھرشانی نندانک ھلاس کرتگ۔ دہ روچ ءَ را ماھے سرجم بوتگ بلے دلجان یل کنگ نہ بوتگ۔
آئی ءَ گوشتگ کہ یک ماھے ءَ پد کھول ءَ گوں آدگہ ھندی مردمانی ھمراھی ءَ دمگدارءَ کارگس ءِ دیم ءَ وتی زھرشانی نندانک برجاہ داشتگ، چہ ایشی ءَ ابید آدگہ بنشون ھم کارگپتگ اَنت ءُ زھرشانی ءَ آواران کراچی شھدگ بند کرتگ۔ اے میان ءَ باز رند ءَ پہ گپ ءُ تران ءَ جھد کنگ بوتگ بلے بے سوب بوتگ اَنت، مرچی پد ءَ دمگدار گوں آدگہ ھندی مردمانی ھمراھی ءَ آتکگ ءُ پہ دلجان ءِ آجوئی ءَ دو ماہ ءِ کول کرتگ ما آئی سر ءَ بیسہ کرتگ ءُ پہ دو ماہ ءَ نندانک ءَ ھلاس کنگ ءَ ایں۔
آئی ءَگوشتگ کہ مئے لوٹ ھمیش اِنت کہ نندانک ءِ ھلاسی ءَ پد زوت کمک دمگدار ءِ سروکی ءَ یک پترے ٹھینگ بیت ایشی تہ ءَ کھول ءِ مردماں ابید ھندی مردم ھم زورگ بنت۔ داں دو ماہ ءَ دلجان آجو کناھینگ بیت۔ زھرشانی ءِ میان ءَ کجام مردم ءِ سر ءَ ایپ آئی آر نبیسگ بوتگ آ ھلاس کنگ بنت۔ آئی کھول ءِ مردم پد ءَ پوسٹانی سر ءَ زورگ بنت۔ زھرشانی کنوکیں مردمانی گون ءَ رند ءَ زوراکی کنگ نہ بیت۔
آئی ءَ گوشتگ کہ اگاں دو ماہ ءِ میان ءَ دلجان ء اللہ بکش آجو کنگ نہ بوتگ گڑا ما گوں دمگدار ءَ کارگس ءَ ھوار آدگہ جاھاں ھم زھرشانی کن ایں۔
