بلوچ راجی زرمبشت ( بی این ایم ) ءِ بنجاھی کارگشاد دل مراد ءَ زرمبش یوٹوب چینل ءِ لک سبسکرائبر ءِ سرجم بوگ ءَ زرمبش ءِ باسک مراد باتی داتگ اَنت ءُ گوں آیاں دلگوش گور کرتگ ءُ گوشتگ کہ من زاناں چہ شما کس ءَ پہ اھوالکاری ءَ زانشجاھاں نہ ونتگ۔ شما سند گپتگیں اھوالکار نہ اِت، بلے شما لس اھوالکار ھم نہ اِت۔ شما چہ بلوچ ءِ درد ءِ زرا لھتیں ترمپ زُرتگ ءُ ایشاں ھال ءِ دروشم ءَ جوڑ کنگ ءُ داں بلوچ ءَ سر کنگ ءَ اِت۔ پمشکا اے درد شمارا گوں وت ھمگرنچ کنت ءُ توان بکش ایت۔
آئی ءَ گوشتگ کہ شما کار بہ کن اِت، ردی بہ کن اِت ءُ در بہ بر اِت۔ تژن ءُ ایراداں اوپار کن ات۔ زمانگ ءِ اپلاتون ءُ ارستو ءِ تورناکیں دانکاں ھم اوپار کن اِت بلے گوں وتی کار ءَ دلگوش بہ اِت۔ چی ءَ کہ شمئے مول ءُ مُراد سک مزن اِنت ءُ شمئے راہ گچینی راھے۔
دل مراد ءَ گوشتگ کہ یک لک سبسکرائبر پہ جھان ءَ ھچ نہ اِنت، ھدا زانت ھچ نہ اِنت، بلے پما اے سک ارزیشت دار ایت۔ اے ھمے راہ ءِ کسانیں سوبمندی یے۔ اد ءَ اوشتگی نہ اِنت، نوں چماں ملین سبسکرائبر ءَ سک بہ کن اِت ءُ شما اے کار ءَ کرت کن اِت۔ چی ءَ کہ شما درس پہ پگار ءَ کار ءَ نہ اِت بلکیں پہ دل کنگ ءَ اِت۔
آئی ءَ گوشتگ کہ زرمبش ءِ ھمبلاں اے شمئے جُھدانی برورد اِنت، جُنزان کن اِت۔
