آواران: زوربیگواھیں دل جان ءِ کھول ءِ زھرشانی ءَ مرچی ھشت روچ سرجم بوتگ انگت ءَ برجاہ اِنت۔ چہ آواران دمگدار ءِ کارگس ءِ دیم ءَ نندانک ءِ برجاہ بوگ ءَ ابید آواران لسبیلہ دگ ھم بند اِنت۔
اے وھد ءَ سول سوسائٹی ءِ سروک گلزار دوست، بلوچ وومن پورم شال ھنکین ءِ سروک سلتانہ، سیاسی ءُ چاگردی کارکنانی ھواری ءَ جنین ءُ زھگاں بازیں کچے ءَ بھر زرتگ ءُ نشتگ اَنت۔
کھول ءِ گوشگ اِنت کہ مئے زھرشانی نندانک ءَ ھشت روچ اِنت کہ برجاہ اِنت چہ سرکار ءِ نیمگ ءَ پہ مئے لوٹانی گوش دارگ ءَ ھچ وڑیں دلجمیں گامگیج زورگ نہ بوتگ۔
آیاں گوشتگ کہ اے زھرشانی ءَ پیریں، زھگ ءُ جنین ھوار اَنت دمگ ءِانتزامیہ بس ھمے یکین ھبر ءَ کنت کہ شمئے زھرشانی نندگ کانود ءِ بگیری اِنت۔ اے چونیں کانودے؟ وھدے کہ شما اے گپ ءَ ھما وھد ءَ نہ کن اِت آ بے میار ءَ مئے گساں بیڑ بر اَنت ءُ مئے آزیزاں آوار جن اَنت ءُ گوں وت بر اَنت؟ آ وھد ءَ شمئے کانود کج ءَ اِنت؟ شما بس نزوریں مردماں ھمے گپ ءَ گوش اِت اے درکانودی اِنت۔
آئی ءَ گوشتگ کہ ما مدام ھمے گوشگ ءَ ایں کہ اگاں دلجان ءِ سر ءَ چونیں بھتامے ھست گڑا آمیدگس ءَ پیش کنگ بہ بیت، شما آئی ءِ باروا پٹ ءُ پول بہ کن اِت۔ بلے اد ءَ زوراکی ءِ گڈی آسر اِنت۔ دوشی انتزامیہ ءَ زھرشانی نندانک ءَ نشتگیں مردمانی بگیری ءَ ایپ آئی آر نبشتگ۔ اے زھرشانی نندانک ءَ پنچ ءُ شش سالی زھگ ھم ھوار اَنت۔ شمئے کانود ھمیش اِنت کہ زھگانی بگیری ءَ ایپ آئی نبشتہ بہ کنت۔
آئی ءَ دیمتر ءَ گوشتگ کہ نوں چہ گڈانی ءَ لیویز ءِ جنینیں کارمند ھم لوٹائینگ بوتگ اَنت ھمے گمان کنگ بوگ ءَ اِنت کہ زھرشانی ءَ نشتگیں مردماں لٹ شاپ بہ کن اَنت۔
کھول ءَ گوں مردمی ھکانی ادارھاں لوٹ کرتگ ءُ گوشتگ کہ بلوچستان سرکار اے جیڑہ ءَ گوں سنگینی ءَ بہ چار ایت ءُ پہ دلجان ءِ آجوئی ءَ دلجمی بہ دنت۔
