
بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 19 نومبر ءَ کولواہ ءِ ھند گیشکور ءَ سرمچار گل ءِ کارے ءَ روچ ءَ بوتگ اَنت کہ پیسر ءَ سنگر گپتگ ءُ نشتگیں دژمنیں لشکر ءَ آیانی سر ءَ اُرشکرتگ، اُرش ءِ آسر ءَ گل ءِ دو مزن ءُ کوھنیں ھمبل شھید بوتگ اَنت۔ شھید سرمچار کیپٹن نیاز کادر پنام استاد گمان جاھی شھید بوتگ، زریپ پنام شے جان ٹپی بوتگ۔ سپر ءَ ھوریں ھمبلاں دژمنیں لشکر ءِ شریں وڑے ءَ دیم پہ دیمی کرتگ ءُ میڑ ءَ شھید کیپٹن نیاز کادر ءُ آدگہ ٹپی بوتگیں شے جان ءِ گوں جنگی ساز ءُ ساماناں کشگ ءَ سوبین بوتگ اَنت۔
آئی ءَ گوشتگ کہ کیپٹن نیاز کادر ء کادربکش جاہ منند گڑوپ پاھو 2013 ءَ راجی آجوئی زرمبشت ءَ بھر زرتگ ءُ 2014 ءَ گوں بی ایل ایپ ءَ ھوار بوتگ۔ اے دراجکشیں جھد ءِ میان ءَ کیپٹن نیاز کادر ءِ سرجمیں کھول مچی سزا ءِ جنجالانی دیمپان بوتگ۔ بلے آ چہ وتی راجی آجوئی ءِ لیکہ ءَ کمیں پدکنز نہ بوتگ۔ شھید ءِ مستریں برات شھید لیپٹیننٹ سابر پنام تاھیر ءُ ناکوزتک شھید کیپٹن زھور بالی گوں وتی گل ءِ ھمبل سیکنڈ لیپٹیننٹ ساجد سمیر ءُ اکبر ھمل ءِ ھواری ءَ 2022 ءَ دژمن ءِ یک برزی اُرشے ءَ شھید بوتگ اَنت۔ آئی مات ءُ پت پاکستانی لشکر ءِ باز براں زوریں بیگواھی ءِ نشانگ کرتگ اَنت۔ مرچی آ باھوٹی زند گوازینگ ءَ لاچار اَنت۔ کیپٹن نیاز کادر وھد پہ وھد ءَ گل ءِ سیاسی، لشکری ءُ انٹلیجنس ءِ بھرگانی تہ ءَ جوانیں کرد پیلو کرتگ ءُ دژمن ءِ مزن مزنیں پروگرامی ھلاس کنگ ءَ سوبین بوتگ۔ آئی ءَ بلوچستان ءِ گیشتریں ھنداں آواران، جاؤ، کولواہ، اورماڑہ، کیلکور ءُ بالگتر ءَ جنگانی میان ءَ مزنیں کردے پیلو کرتگ ءُ دژمن ءِ سر ءَ ترندیں اُرش کرتگ۔
جارکش ءَ گوشتگ کہ کیپٹن نیاز کادر آواران ءُ کولواہ ءَ براس ءِ بابت ءَ گل ءِ پارست ءَ مزنیں اگدھے ءَ سر ءَ بوتگ۔ چہ وتی جنگی بودناکی ءُ نوکیں ٹیکنالوجی ءِ زانگ ءِ سوب ءَ وتی گل ءِ دوستانی میان ءَ یک استادے ءِ بستار ءَ زانگ بوتگ۔ آئی ءَ گل ءِ کربان یونٹ ءِ ھمگرنچیں سرمچارانی پہ جنگی ءُ جانی توانمندی ءَ سکا جپاکشی کرتگ ءُ باز کار کرتگ۔
آئی ءَ گوشتگ کہ لیپٹیننٹ زریپ پنام شے جان ء ھمل جاہ منند گیشکور سنڈم 2013 ءَ آجوئی زرمبشت ءَ ھوار بوتگ ءُ 2014 ءَ بی ایل ایپ ءَ بھر زرتگ۔ اے دراجکشیں جھد ءَ دژمنیں لشکر ءِ گنتریں زوراکیانی دیم پہ دیمی کرتگ۔ آئی کھول ءِ بگیری ءَ ریاست ءِ آزادھیں کاروائیاں آئی لیکہ ءُ کار نزور کرت نہ کرتگ اَنت۔ 19 نومبر ءَ یک گل ءِ مشنے ءِ میان ءَ دژمنیں لشکر ءِ گون ءَ میڑ ءَ آ سکا ٹپی بوتگ ءُ آئی ءَ گل ءِ ھمبلاں مھکمیں جاھے ءَ سر کرتگ۔ اے دو روچانی میان ءَ گل ءِ جاندراھی تک ءِ ٹولی ءَ پہ آئی درمان کنگ ءَ وتی درمان کارگپتگ اَنت۔ چہ بد بھتی ءَ آئی رکینگ ءَ بے سوب بوتگ اَنت۔ آجوئی زرمبشت ءَ آئی دہ سال ءِ بے ھال نہ کنوکیں جنگانی تہ ءَ وتی کرد پیلو کرتگ ءُ گوں مزنیں جپاکشی ءُ جنجلاں گل ءِ مالی کمک کرتگ ھمیشی برورد ءَ ریجنل کمانڈ کونسل ءَ آئی لشکری ءُ سیاسی مھکمیانی سوب ءَ لیپٹیننٹ ءِ اگدہ ءِ سر ءَ گچین کرتگ۔ آئی سکا گوں جپاکشی ءُ ایمانداری ءَ گل ءِ پروگرام برجاہ داشتگ اَنت ءُ داں گڈی دم ءَ ھما وڑ ءَ اوشتاتگ۔ آجوئی جھد ءِ تہ ءَ آ چہ وتی مزنیں کرد ءِ برورد ءَ مدام یاد کنگ بیت۔
میجر گھرام ءَ گوشتگ کہ بی ایل ایپ وتی ھمبلیں سرمچار کیپٹن نیاز کادر پنام استاد گمان ءُ لیپٹیننٹ شھید زریپ پنام شے جان ءَ ھوار بلوچ راجی جھد ءِ راہ ءَ شھید بوتگیں درسیں شھیداں ستک شانی ندر کنت ءُ ھمے کول ءَ کنت کہ آیانی بے مٹیں دیمونیانی سر ءَ بی ایل ایپ وتی سیاسی ءُ جنگی پروگراماں گوں ترندی ءَ برجاہ دار ایت ءُ ما ھمے کول ءَ کن ایں کہ بلوچ شھیدانی ھون کدی شموشگ نہ بنت بلکیں داں بلوچستان ءِ آجوئی ءَ جھد ءَ برجاہ دار ایں۔