زور بیگواھیں ڈاکٹر دین مھمد ءِ جنک سمی دین ءَ ماں رسانکدر ءَ وتی شنگ کرتگیں درشانے ءَ گوشتگ کہ 12 جون 2024 ءَ آواران ءِ جاہ منندیں دلجان ءَ پاکستانی لشکر ءَ آوار جتگ ءُ بیگواہ کرتگ۔ انگت ءَ آئی باروا ھچ وڑیں ھال دیگ ءَ نہ اَنت کہ آ چون ءُ کج ءَ اِنت۔
آئی ءَ گوشتگ کہ پہ دلجان ءِ آجوئی ءَ کھول ءَ باز بر ءَ زھرشانی کرتگ ءُ انوں یکبرے پد ءَ آواران دمگدار ءِ کارگس ءِ دیم ءَ زھرشانی ءَ نشتگ اَنت۔ واکدار ءُ پھازداریں ادارھانی کارمند آیاں پہ زھرشانی ءِ ھلاس کنگ ءَ بیھار دیگ ءُ ترسینگ ءَ اَنت۔ پہ زھرشانی نندانک ءَ جتگیں ٹینٹ ھم واکدار ءَ دور کرتگ ءُ چگل داتگ۔ کھول زیکین ءِ پچیں آزمان ءِ چیر ءَ نشتگ اَنت۔
سمی دین ءَ گوشتگ کہ اگاں بلوچستان رسانکدری ادارہ وزیران ءَ زوریں بیگواھی ءِ باروا جست کنگ ءَ ابید سانمندیں کھولاں جست بہ کن اَنت گڑا راستی ءَ زانت کن اَنت۔ بلے آواران ءِ وڑیں پد منتگیں ھند ءِ مردم چہ پاکستانی رسانکدری ادارھانی نیمگ ءَ ھچ دلگوش دیگ نہ بوتگ اَنت۔
