نیدرلینڈز : دی ھیگ ءَ چہ بلوچ راجی زْرمبشت ( بی این ایم ) ءِ نیمگ ءَ بلوچ شھمیرانی روچ ءِ درگت ءَ سسا تْرانی نیادے ( سیمینار) برجم دارگ بیتگ۔مراگش ءِ بندات گوں شھمیرانی یات ءِ دو دمان ءِ بے تواری ءَ بوت ۔ چہ ایشی ءَ پد بکشی ، آبد جان ءُ باست زھیر ءَ راجی سوت ونتگ۔
مراگش ءِ تہ ءَ بھرزیروکاں شھمیرانی بارہ ءَ دستاویزی تامرے ھم پیش دارگ بیتگ۔
سسا تْرانی نیاد ءَ بی این ایم ءِ سرکماش ڈاکٹر نسیم ، دری کارانی کارگشاد پھیم ، بی این ایم نیدرلینڈز ءِ کماش مھیم ابدورھیم ، کمک کماش وھید ، ابدل گنی ، ناکو واھد ، ڈاکٹر لتیپ ، کیا ، جمال ، جواھر ، مھمد ءُ دگراں گپ جتگ۔
بی این ایم نیدر لینڈز ءِ کارگشاد دیدگ ءُ کمک کارگشاد آلیہ ءَ جارچینی کرتگ۔
تْرانکاراں گْوشتگ اے روچ بلوچ راجی شھمیرانی یات ءَ دارگ بیت۔13 نومبر 1839 ءَ برتانیا ءِ لشکر ءَ بلوچ سرڈگار زور گرگ لوٹ اِت ءُ ارش کرت بلے ھان مھراب ھان ءَ گوں وتی کمیں ھمراہ ءُ مڈیاں آئی ءِ دیم داشت ءُ شھمیر بوت ۔ آئی ءَ مرگ من اِت بلے زورگری ءُ چیردستی نہ من اِت۔
’’ اے وھدی ھزاراں بلوچ پاکستانی لشکر ءِ دست ءَ شھمیر بیتگ۔ آیانی تہ ءَ جنین ، چک ، کماش ءُ ورنا ھوار اِنت۔ بلوچستان ءَ آجوئی ءِ گْوستانک سکا کْوھن اِنت۔ بلوچ راج ءَ مدام پہ وتی ربیدگ ، زبان ءُ مڈیانی پھریزگ ءَ جھد کرتگ۔ اے روچ شھمیرانی دیمونیانی یات کنگ ءُ جھد ءِ زندگ دارگ ءِ روچ اِنت داں آیوکیں پدریچ آیانی دیمونی ، ھاک ءِ دوستی ءُ وپادرای ءِ مارشتاں سرپد بہ بیت۔‘‘
آئی ءَ گْوشتگ گْوستانک ءَ پرتگیز بیتگ اَنت یا برتانیا بلوچ راج ءَ کسی ھم زیردستی ءُ واکداری نہ من اتگ۔ ءُ مروچی ھم مھراب ھان ءِ بھادری ءِ داستان نامدار اَنت۔ شھمیر چہ ما سستگ اَنت بلے آیانی سسا ءُ لیکہ زندگ اَنت۔شھمیرانی بے دروریں دیمونیانی برورد ءَ مروچی بلوچ زْرمبشت جھان ءِ کنڈ کنڈ ءَ سر بیتگ۔ اے زْرمبشت شھمیرانی واھگ ءُ مولاں سرجم کنت۔
