شال: بیگواھیں بلوچانی توار ( وی بی ایم پی ) ءِ سرکماش نسراللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ چہ آواران ءَ زوربیگواہ کنگ بوتگیں ھاسل ھان ءِ بیگواھی ءِ کیس آئی برات ءَ گل ءِ کر ءَ یاداشت کرتگ۔
آئی گوشتگ کہ ھاسل ھان ءِ برات زپیر اھمد ءِ گوشگ اِنت کہ آئی برات ھاسل ھان ء یارو ھمے سال ءِ 26 اپریل ءَ پاکستانی لشکر ءَ آواران ءِ ھند مشکے ءِ پنڈکی بنجل ءَ رھوت کرتگ ءُ پہ پیشی ءَ لوٹائینتگ۔
آئی گوشتگ کہ منی برات گوں وتی ناکو زتک سلیم ءِ ھواری ءَ بنجل ءَ شُتگ۔ پاکستانی لشکر ءِ یک کارمندے ءَ سلیم ءَ گوشتگ کہ چہ دکان ءَ پہ ما سامان بیار سلیم پہ سامان ءِ گرگ ءَ دکان شُتگ ءُ واتر آتکگ کہ ھاسل ھان اود ءَ نہ اِنت آئی جست کرتگ کہ ھاسل ھان کج انت؟ لشکری کارمنداں گوشتگ کہ آ پہ جست ءُ پرس ءَ برتگ اِش کیت۔
آئی گوشتگ کہ ھپت ماہ ءِ گوزگ ءَ پد ھم ھاسل ھان ءَ پاکستانی لشکر ءَ یل نہ کرتگ ءُ نیکہ آئی بابت ءَ کھول ءَ سرپدی دیگ بوتگ کہ چہ آئی بیگواھی ءِ سوب ءَ کھول سکا جنجال اِنت۔
نسراللہ ءَ گوشتگ کہ گل ءَ زپیر اھمد ءَ دلجمی داتگ کہ آئی برات ھاسل ھان ءِ کیس ءَ سرکار ءُ پہ بیگواھیں مردماں جوڑ کنگ بوتگیں کمیش ءُ اکوامتھدہ ءِ کار کنوکیں ٹولی ءَ سر کنت ءُ پہ آئی آجوئی ءَ توار چست کنت۔
نسراللہ ءَ چہ سرکار ءَ لوٹ کرتگ کہ ھاسل ھان ءِ سر ءَ چونیں بھتامے ھست آمیدگس ءَ پیش بہ کن، اگاں آ بے میار اِنت آ زوت آجو کنگ بہ بیت ءُ آئی کھول چہ اے رنجاں در کنگ بہ بیت۔
