بلوچ نیشنل موومنٹ ( بی این ایم) ءِ نیمگ ءَ جرمنی ءِ بنجاھی شھر برلن ءَ بلوچ شھیدانی سالروچ ءِ درگت ءَ دیوانے برجم دارگ بیتگ۔ دیوان ءِ تلو ءِ زمہ واری جرمنی چپٹر ءِ کارگشاد شلی بلوچ ءُ جرمنی چپٹر ءِ باسک ندیم سلیم ءَ گوں بیتگ اَنت۔
اے دیوان ءَ بلوچ نیشنل موومنٹ( بی این ایم ) ءِ چیئرمین ڈاکٹر نسیم بلوچ ءَ ھوار بی این ایم ءِباسک ءُ دوزواہ ءُ آدگہ راج ءُ گلانی سروکاں ھم بازیں کچے ءَ بھر زرتگ۔
مراگش ءَ بھر زرتگیں مردماں بلوچ شھیدانی دیمونی ستک شانی ندر کرتگ اَنت ءُ گوشتگ کہ ما مرچی بلوچستان ءَ ھما نہ ترسیں بچ ءُ جنکاں یاد کنگ ءَ ایں کہ آیاں پہ ھمے ستک ءَ وتی جانانی دیمونی داتگ سرڈگارءِ آجوئی ءُ شرپ ءِ زندگی گوازینگ چہ جانانی نھاد ءَ باز دیمءَ اِنت۔
آیاں گوشتگ کہ بلوچستان ءَ چنچو دھک اِنت کہ پاکستان ریاست ءِ زوراکی برجاہ اِنت اے میان ءَ سے پدریچاں وتی جانانی دیمونی داتگ ءُ پہ بلوچ راجی جنز گوں مھکمی ءَ برجاہ اِنت۔ اے زوراکیانی تہ ءَ زوریں بیگواھی، درکانودی کوش ءُ مچی مانشانی دزکپگ ھم ھوار اَنت۔
آیاں گوشتگ کہ مرچی اد ءَ شھیدانی یاتگیری مراگش ءَ ھمے پیش داشتگ کہ راج وتی راجی شھیداں بے ھال نہ کن اَنت ءُ شھیدانی دیمونی ھچ وڑ ءَ زوال نہ بنت۔ شھیدانی داتگیں دیمونی مئے سر ءَ وام اَنت ءُ مارا پہ آیانی کاروان ءِ دیم ءَ برگ ءَ گوں زانت ءُ زانشت ءَ پیسلہ زورگ لوٹ ایت۔
آیاں گوشتگ کہ راجی شھیداں زوریں بیگواھی، ریاستی آزار ءُ پند ءُ آزابی درس دیستگ اَنت بلے چہ ایشی ءَ ابید آ چہ وتی راجی آجوئی ءِلوٹ ءَ پد کنز نہ بیتگ اَنت ءُ نوں مئے زمہ واری اِنت کہ ھما واب مئے راجی شھیداں دیستگ اَنت ما ھما شھیدانی کاروان ءَ دیم ءَ براں بہ کن ایں ءُ داں گڈی منزل ءَ سر بہ کن ایں۔
