بلوچ یکجھتی کمیٹی ءِ سروک ڈاکٹر ماہ رنگ ءَ ماں رسانکدر ءَ وتی شنگ کرتگیں درشانے ءَ گوشتگ کہ 13 نومبر ءِ درگت ءَ راجی شھیداں سھریں دروت ندر کناں۔ مرچی ھما راجی بامردانی روچ اِنت کہ آیاں وتی زات ءُ زاتی زند پہ بلوچ ءِ وشیں باندات ءَ کربان کرتگ اَنت، مرچی مئے چاگرد کہ دیمروئی ءِ نیمگ ءَ جنزان اِنت آئی ءِ پشت ءَ ھمے شھیدانی ھون اَنت۔
آئی ءَ گوشتگ کہ اگاں ما لوٹ ایں ما پہ وت ءَ وش ءُ وشھال ءُ زندگیں چاگردے جوڑ بہ کن ایں ءُ بلوچ دیمروئی کرتگیں راجے بہ بیت، گڑا مارا وتی زات ءُ وتی دیوانانی باز چیز مٹ کنگ لوٹ انت، مارا گونڈیں سوچ، زد ءُ انا ھلاس کنگ لوٹ اَنت۔ اگاں مارا اے نازاکیں ورناھانی کربانی ءُ ھون ءِ مارشت ھست گڑا ما وتی تاکت ءَ یکے دومی ءِ بگیری ءَ کارمرز کنگ ءِ جاہ ءَ وتی سرجمیں تاکت ءَ “بلوچ ءِ دژمن” ءِ بگیری ءَ ھرچ بہ کن ایں، پہ راجی یکجاھی ءُ یکشمتی ءَ وتی کسان کسانیں نام، زد ءُ انا ءَ کربان بہ کن ایں ءُ وتی سرجمیں زوراں بلوچ جنز ءِ مھکم کنگ ءِ سر ءَ بدے ایں۔
ڈاکٹر ماہ رنگ ءَ گوشتگ کہ بلوچ راجی شھیداں پہ یک وشھالیں بانداتے ءَ وتی سرجمیں زند کربان کرتگ، یک وشھالیں بلوچ چاگردے منی گوں ھوار ھرچ بلوچ ءِ واھشت انت، بلے راج ءُ چاگرد پہ واھشت دیمروئی نہ کن انت ءُ نہ تھنا چہ لھتیں مردماں کربانی لوٹ اَنت، بگندئے چاگرد چہ یک یک مردم ءَ کار ءِ لوٹ کنت۔ گھگیری، جھد، لبزانک، وانگ، سائنس، ٹیکنالوجی ھرچ یک پیلڈے کہ آئی ءِ راج ءُ چاگرد جوڑ کنگ ءِ تہ ءَ کرد ھست ھما جاہ ءَ وتی کرد ءَ پیلو بہ کن ایں۔
آئی ءَ گوشتگ کہ اے وھد ءَ بلوچ چاگرد جنگ ءِ آماچ اِنت، بلوچ ورنا وتی شھیدانی رتگیں ھون ءُ کربانیاں وتی دیم ءَ ایر بکن اَنت ءُ بہ جیڑ انت کہ مئے وھد، بودناکی ءُ توان پہ بلوچ ءِ جنز ءُ باندات ءَ ھرچ بوگ ءَ اَنت یا انچوش پہ بے سر ءُ پادیں کاراں زوال بوگءَ انت، اگاں بے سر ءُ پادیں جاہ ءَ ھرچ بوگ ءَ اَنت گڑا مارا ایشانی سرءَ باز جیڑگ لوٹ ایت ءُ وتی زند مٹ کنگ لوٹ ایت پرچہ کہ جنز تھنا پہ ھمدردی ءِ بنیات ءَ سوبمند نہ بنت، بگندئے چاگردے ءِ ھرچ یک مردمے وتی کرد ءَ پیلو بہ کنت۔ مئے چاگردءِ ھرچ مردم بزاں ورنا ھمے گپ ءَ سک باز بہ جیڑ اَنت کہ آ کجام جاہ ءُ کجام پڑ ءَ پہ بلوچ ءُ بلوچستان ءَ وتی کرد پیلو کت کن انت گڑا ھما جاہ ءَ وتی کرد ءَ پیلو بکن اَنت، کسے شریں جھدکارے بوت کنت، کسے شریں ٹیچرے بوت کنت، کسے سائنسدانے بوت کنت، کسے شریں نبشتکارے بوت کنت، کسے شریں اھوالکارے بوت کنت، کسے شریں آرٹسٹے بوت کنت، کسے شریں زبان زانتے بوت کنت، کسے نوکیں دورءِ ٹیکنالوجی ءِ تہءَ زانتکارے بوت کنت بلے اے درستیں تک ھما وھد ءَ بلوچ چاگرد ءُ بلوچ راجی جنز ءِ کارءَ اتک کن انت کہ مئے مارشت راجی بہ بنت، مچی بہ بنت، پرچہ کہ اگاں ما اے کلیں چیزاں پہ وتی زاتی نپ ءُ سیتاں بہ کن ایں گڑا راج ءُ چاگرد ءَ ایشانی ھچ نپ نہ رس ایت۔
ڈاکٹر ماہ رنگ ءَ گوشتگ کہ منی نزیک ءَ بلوچ راجی شھیداں دروت ندر کنگ ءِ شرتریں راہ ھمیش اِنت کہ آھانی گچین کُتگیں راہ ءِ سرءَ کار بہ کن ایں ءُ راجی جنز ءَ وڑے نہ وڑے ءَ الم وتی کرد ءَ پیلو بہ کن ایں
