کیچ: کُڈان دشت ءَ زی بیگاہ ءِ اَدار پنچ ءَ پجار نہ بیتگیں سلاہ بندیں مردماں پاکستانی لشکر ءِ بنجل ءِ سر ءَ اُرش کُرتگ اَت، اُرش داں دو اَداراں یکشل ءَ گوں تُرندی ءَ برجاہ بیتگ۔
ھندی مردمے ءَ گوں زْرمبش ءِ اھوالکار ءَ تران کنان ءَ گْوشتگ کہ سلاہ بندیں مردم سک باز بیتگ اَنت کہ آیاں لشکر ءِ بنجل چہ دو نیمگ ءَ انگِر کُرتگ ءُ جنگ بندات بیتگ۔ داں دو اَداراں جنگ گوں تُرندی ءَ برجاہ بیتگ۔ سلاہ بندیں مردم بنجل ءِ نزیک ءَ سر بیتگ اَنت ءُ بنجل دیوال ءُ سنگر گولا ءُ دستی بمب جتگ ءُ پروشتگ اَنت۔
آئی ءَ گْوشتگ کہ ھمے میان ءَ پاکستانی لشکر ءِ ڈرون ءُ کمکی لشکر اَتکگ گڑا سلاہ بندیں مردماں وت ءَ پُشت ءَ کَش اِتگ ءُ جنگ بند بیتگ۔
آئی ءَ دیمتر ءَ گْوشتگ کہ اے جنگ ءَ کم چہ کم پاکستانی لشکر ءِ پانزہ ءَ گیش کارمند مُرتگ ءُ باز ٹپی بیتگ۔
آئی ءَ گْوشتگ کہ دوشیگین اِنت لشکر ءَ راہ ءُ در بستگ اَنت ءُ بنجل ءِ نزیک ءَ کس ءَ روگ ءُ آھگ ءَ نیلگ ءَ اِنت۔ گِس گس ءَ پٹ ءُ پول کنگ ءَ اِنت ءُ داں انوں یک ورنایے ءِ آوار جنگ ءِ ھال ھست کہ آئی ءِ نام تلال ء اُمر اِنت، لشکر ءَ دوشی شپ ءِ دوازدہ ءَ آوار جتگ ءُ بُرتگ۔
آئی ءَ گْوشتگ کہ مرچی دشت ءِ جتاجتائیں جاگھاں، کوہ ءُ کوچگاں پاکستانی لشکر ءِ جنگی بالیگ ءُ پیادگیں لشکر تر ءُ گرد کنگ ءَ اِنت۔
اے باروا پاکستانی لشکر ءِ رسانکدری تَک آئی ایس پی آر ءِ نیمگ ءَ ھچ وڑیں درشان دیم ءَ نیاتکگ ءُ بلوچ آجوئی لوٹوکیں سلاہ بندیں گلاں ھم انگت اے اُرش ءِ زمہ واری نہ زُرتگ۔
