کیچ: مند ءِ میتگ مھیر ءَ زورگریں پاکستانی لشکر ءِ نیمگ ءَ گسانی دستیگ کنگ ءِ بگیری ءَ گوستگیں دہ روچ اِنت کہ کھول ءِ نیمگ ءَ زھرشانی نندانک برجاہ اِنت۔
مرچی بلوچ وومن پورم ءِ سروک ڈاکٹر شلی گوں وتی ھمراھاں مھیر ءَ شتگ ءُ زھرشانی نندانک ءَ سر بوتگ۔ اے وھد ءَ سیاسی ءُ چاگردی کارکناں ھوار جنین ءُ زھگ بازیں کچے ءَ زھرشانی نندانک ءَ ساڑی اَنت۔
زھرشانی ءَ نشتگیں مردمانی گوشگ اِنت دانکہ پاکستانی لشکر کشگ ءُ مئے گس ھالیگ کنگ نہ بوتگ اَنت ما وتی زھرشانی نندانک ءَ برجاہ دار ایں۔
آیاں گوں مند ءِ باسمائیں مھلوک ءَ دزبندی کرتگ کہ بیا اَنت ءُ زھرشانی نندانک ءَ بھر بزور اَنت وتی بے تواری ءَ بہ پروش اَنت ءُ پاکستانی لشکر ءِ زوراکیانی بگیری ءَ توار چست بہ کن اَنت۔
