کیچ: مند ءِ میتگ مھیر ءَ پاکستانی لشکر ءِ نیمگ ءَ گسانی دستیگ کنگءِ بگیریءَ زھرشانی نندانک ءَ مرچی نو روچ اِنت کہ برجاہ اِنت۔ زھرشانی نندانک ءَ سیاسی ءُ چاگردی کارکناں ھوار جنین ءُ زھگ بازیں کچے ءَ ساڑی اَنت۔
دوشی یکبرے پد ءَ پاکستانی لشکر ءِ تمپ ءِ بریگیڈیئر ءُ دمگی واکدار پہ گپ ءُ تران ءَ آتکگ اَنت ، آیاں بندات ءَ زھرشانی ءَ نشتگیں مردمانی ترسینگ ءِ جھد کرتگ وھدے کہ مردماں گوں ترندیءَ گوں گپ جتگ گڑا آیاں شش روچ ءِ وھد لوٹ اتگ، گپ ءُ ترانی پتر ءَ آیانی گپ رد کرتگ ءُ گپ ءُ تران بے سوب بوتگ۔
زھرشانی ءَ نشتگیں مردمانی لوٹ ھمیش اِنت دانکہ مئے گس یل کنگ نہ بوتگ اَنت ما وتی زھرشانی نندانک ءَ برجاہ دار ایں۔ گوستگیں پنچ سال اِنت کہ پاکستانی لشکر ءَ مئے گس دستیگ کرتگ اَنت ، چہ ایشی پیش ھم مارا دروگیں دلبڈی دیگ بوتگ بلے آیانی ھشکیں گپ بوتگ اَنت۔
