کیچ: زورگریں پاکستانی لشکر ءِ نیمگ ءَ مھیر ءَ گسانی دستیگ کنگ ءِ بگیری ءَ گوستگیں ھپت روچ اِنت کہ زھرشانی نندانک برجاہ اِنت۔ زھرشانی ءَ سول سوسائٹی، بلوچ یکجھتی کمیٹی ءِ سروک، جنین ءُ زھگاں ھوار مردماں بازیں کچے ءَ بھر زرتگ ءُ نشتگ اَنت۔
پنچ شمبے ءِ روچ ءَ چہ زھرشانی نندانک ءَ کھول ءَ پریس کانپریس کرتگ ءُ آدینگ ءِ روچ ءَ سرجمیں کیچ ءَ تھتگ بند ھرتال کنگ ءِ جار جتگ۔
پریس کانپریس ءَ سول سوسائٹی ءِ سروک گلزار دوست ءَ تران کنان ءَ گوشتگ کہ گوستگیں پنچ سال اِنت ریاستی لشکر( ایپ سی) ءَ بی بی منیرہ نامیں جنینے ءِ گس گوں توپک ءِ زور ءَ دستیگ کرتگ اَنت ءُ میتگ ءِ میان ءَ کوہ ءِ سرا وتی پانگس جوڑ کرتگ چہ ایشی ءَ میتگ ءِ مردم سکا تکانسر اَنت۔
آئی ءَ گوشتگ کہ ریاستی لشکری(ایپ سی) ءِ نیمگ ءَ ھمک شپ گسانی سرا لیٹ جنگ بیت ءُ ڈرون کیمرھانی سرا چہ گِسانی پادمالی ءِ ھواری ءَ جنین ءُ زھگ ترس آماچ کنگ بنت۔
آئی ءَ گوشتگ کہ پاکستانی لشکر ءِ زوراکیانی بگیری ءُ چہ واکدارانی نیمگ ءَ سانمندیں کھول ءِ لوٹانی گوش نہ دارگ ءِ بگیری ءَ وتی زھرشانی ءَ دراجکش کن ایں ءُ باندا سرجمیں کیچ ءَ تھتگ بند ھال ءِ جار ءَ جن ایں۔
آئی ءَ گوں بلوچ راج، مردم دوستیں گلاں ھوار گوں درسیں بھرگاں سیادی داروکیں مردماں لوٹ کرتگ کہ مئے ھمراھداری ءَ بہ کن اِت ءُ لشکر ءِ زوراکیانی بگیری ءَ توار چست بہ کن اِت۔
