نسیر آباد: بلوچ یکجھتی کمیٹی ءِ نیمگ ءَ زوریں بیگواھیانی بگیری ءَ زھرشانیانی درچ ءَ آدینگ ءِ روچ ءَ زھرشانی کنگ بوتگ۔ زھرشانی ءَ مردماں بازیں کچے ءَ بھر زرتگ۔
زھرشانی روانک چہ بلدیہ پٹ ءِ اللہ والا چاراہ ءَ در کپتگ ءُ داں پریس کلب ءِ دیم ءَ شتگ ءُ مچ بوتگ اَنت۔ پولیس ءَ زھرشانی کنوکیں مردم بیھار داتگ اَنت ءُ زوراکیاں ابید آیاں وتی زھرشانی سوبین کرتگ۔
زھرشانی کنوکیں مردماں پولیس ءُ پاکستانی لشکر ءِ زوراکیانی بگیری ءَ اوگام جتگ ءُ درسیں بیگواھیں مردمانی آجوئی ءِ لوٹ کرتگ۔
یات بہ بہ اِت کہ بلوچ یکجھتی کمیٹی ءِ نیمگ ءَ ” بے تواری ءِ پروشگ۔ زوریں بیگواھیانی بگیری ءَ توار چست کنگ“ ءِ بنگپ ءَ ھمے تکشام ءَ بلوچستان ءِ جتائیں ھند ءُ دمگاں زھرشانیانی درچ برجاہ اِنت۔
چہ ایشی پیش کراچی، ھب چوکی، ھزدار، تُربَت، پَنجگُور، ھاران، شال، نوشکے، دالبندین ءُ چاگے شھر ءَ زھرشانی کنگ بوتگ۔
