شال: 2021 چہ بلوچستان زانشتجاہ ءَ زورگریں پاکستانی لشکر ءِ دست ءَ زور بیگواہ کنگ بوتگیں نودربر سھیل ءُ پسی ءِ یل نہ کنگ ءِ بگیری ءَ دو روچی زھرشانی نندانکے برجم اِنت۔
اے زھرشانی نندانک بلوچ اسٹوڈنٹس ایکشن کمیٹی ءِ نیمگ ءَ بلوچستان زانشتجاہ ءِ تہ ءَ برجم دارگ بوتگ۔ زھرشانی نندانک ءَ نودربراں بازیں کچے ءَ بھر زرتگ۔
یات بہ بہ اِت کہ سھیل ءُ پسی ءَ گوستگیں سے سال بیت کہ زور بیگواہ کنگ بوتگ اَنت۔ آ نومبر 2021 ءَ شپ ءَ چہ بلوچستان زانشتجاہ ءَ آوار جنگ ءُ بیگواہ کنگ بوتگ اَنت۔ پہ آیانی زوریں بیگواھی ءِ بگیری ءَ زھرشانی کنگ بوتگ۔ چہ بلوچستان سرکار ءِ نیمگ ءَ پہ آیانی آجوئی ءِ دلجمی دیگ ءَ نودربراں وتی زھرشانی ھلاس کرتگ اَت۔ چہ سے سال ءِ گوزگ ءَ پد آ انگت ءَ دیم ءَ آرگ نہ بوتگ اَنت۔
بساک ءِ نیمگ ءَ شنگ بوتگیں جارے ءَ گوشگ بوتگ کہ چہ دو روچی نندانک ءَ ابید آدگہ شھرانی تہ ءَ روانک کشگ ءِ ھواری ءَ رسانکدر ءَ کمپین ھم برجاہ دارگ بیت۔
