پنجگور وانشجاہ ءِ پھازدار ءُ چہ چتکان ءَ زور بیگواہ کنگ بوتگیں ارشاد اھمد ء سوپی مھمد اسماھیل ءِ کھول ءَ پریس کانپریس کرتگ ءُ گوشتگ کہ ارشاد ء اسماھیل یک ایمنیں شھری یے گوستگیں چنچو روچ اِنت کھول سکا درد ءُ رنجانی دیمپان اِنت۔ آیاں درسیں ادارہ، دمگی واکدار، پولیس، سیاسی پارٹی ءُ گوں ملاھاں لوٹ کرتگ کہ آ ارشاد اھمد ءِ آجوئی ءَ وتی کرد ءَ پیلو بہ کن اَنت۔
آئی ءَ گوشتگ کہ ارشاد اھمد ء سوپی اسماھیل پنجگور وانشجاہ ءِ پھازادر اِنت ءُ سکا شریں مردمے اِنت۔ آئی چہ وانشجاہ ءِ وتی کار ءَ ابید دگہ ھچ کار نہ کرتگ۔ آ چہ گِس ءَ وانشجاہ ءُ چہ وانشجاہ ءَ گس ءَ آتکگ۔ بلے گوستگیں روچاں لھتے سلاہ بندیں مردم گاڑی ءَ سوار بوتگ اَنت آیاں بے میار ءَ آوار جتگ ءُ گوں وت برتگ، چنچو روچ ءِ گوزگ ءَ پد ھم آئی ھچ وڑیں ھال نیست۔ چہ ایشی کھول سکا جنجالانی دیمپان اِنت۔
آئی ءَ گوشتگ کہ مئے گوں کس ءَ ھچ وڑیں دژمنی نہ بوتگ ءُ نہ ھم ارشاد اھمد اسماھیل دگہ درکانودی کارے ءَ ھوار بوتگ۔ اگاں کسے ءَ گوں آئی ھساب یا دژمنی یے ھست گڑا آ گوں کھول ءَ ھال بہ کنت۔
آئی ءَ گوں درسیں سرکاری ادارہ ءُ دمگی واکدار ءَ لوٹ کرتگ کہ ارشاد اھمد اسماھیل ءِ پہ مردمی ھمدری ءِ بنیاد ءَ کرد ءَ پیلو بہ کن اَنت۔ چہ ایشاں ابید ھندی میر ءُ مھتر، ملاھانی گون ءَ لوٹ کن ایں کہ مئے ورنا ارشاد اھمد اسماھیل ءِ گمیگیں کھول ءِ گون ءَ کمک بہ کن اَنت۔ ما وتی بسات ءِ رد ءَ ھر وڑیں کوشست کرتگ بلے بے سوب بوتگ ایں۔ مئے لوٹ ھمیش اِنت کہ زور بیگواھیں ارشاد اھمد اسماھیل ءَ آجو بہ کناھین اِنت۔
آئی ءَ گوشتگ کہ اگاں داں چل ءُ ھشت اداراں ارشاد اھمد آجو کنگ نہ بوت ما زھرشانی ءَ سی پیک دگ ءَ بند کن ایں۔
