بلوچ وومن پورم ءَ ماں رسانکدر ءَ ھمیدہ ءِ بیرانی ءَ وتی دلپدردی درشان ءَ گوشتگ کہ ھمیدہ ءِ بے وھدیں روگ ءَ ما باز دلپدرد بوت ایں، بازیں وھد بیت ھمیدہ شومک (کینسر ) ءِ نادراھی ءِ آماچ بوتگ ءُ مروچی آ وتی ابدی جاہ ءَ شُتگ۔ بلوچ یک انچیں دور ءِ تہ ءَ گوزگ ءَ اِنت ما زان ایں مئے مردمانی زند چینکس گران بھا اَنت۔ اے جاورانی تہ ءَ اے وڑیں دلیریں ءُ نہ تروسوکیں شیرزالے روگ پہ بلوچ راج ءَ تاوانے۔
آئی ءَ گوشتگ کہ ھمیدہ یک گمنامیں کارستے ءِ ھمراھی ءَ سکیں دل پھکیں مردمے اَت آئی ءَ وتی زند ءِ ھمک ساھت پہ وتی راج ءِ نام ءَ ندر کرتگ اَنت، آ مدام زوراکی ءِ دیم ءَ چوں کوہ ءِ باتیل ءَ مِک بتگ ءُ گوں تمردی ءَ جھد کنان اَت۔ ما نمیرانیں سنگت ھمیدہ ءَ دروت ندر کن ایں ءُ اے گرانیں ساھت ءَ بلوچ وومن پورم گوں آئی ءِ کھول ءِ گماں شریدار اِنت۔ شالا ھاوند ھمیدہ ءِ گُڈی جاہ ءَ وش کنات ءُ آئی ءِ کھول ءَ را سگ ءُ اوپار بہ دنت ۔
