ھاران: 20 اکتوبر ءَ چہ میزان بینک ءِ کِر ءَ پاکستانی لشکر ءِ دست ءَ زور بیگواہ کنگ بوتگیں ابید اللہ تگاپی ءِ کھول ءَ پریس کانپریس کرتگ ءُ گوشتگ کہ ابید اللہ تگاپی ء ھاجی برکت 20 اکتوبر ءَ نیمروچ ءِ یک ءَ چہ میزان بینک ھمل مارکیٹ ءَ زور بیگواہ کنگ بوتگ، ءُ چہ ایشی پیش 2018 ءَ ابید اللہ تگاپی پاکستانی لشکر ءَ یکبرے بیگواہ کرتگ اَت۔
آئی گوشتگ کہ ھاران شھر ءِ جاہ منند ابید اللہ تگاپی ءِ لشکر ءِ دزگیر کنگ ءَ پد پنچ روچ گوستگ آئی ھچ وڑیں ھال نیست۔ بلے چہ آئی کھول ءُ بی وائی سی ءِ زھرشانیاں ابید واکدار ءَ انگت ءَ ھچ وڑیں کاروائی نہ کرتگ۔
آئی ءَ گوشتگ کہ پاکستان ریاست ھمک گام ءَ پیش دارگ ءَ اِنت کہ بلوچستان ءَ ایمنیں زھرشانی ءَ ھچ وڑ ءَ اوپار کرت نہ کناں، زھرشانی ءِ موکل ءَ پاکستان راھبند ھم دنت، بلے چہ ایشی ءَ ابید ھاران پولیس ءِ نیمگ ءَ بی وائی سی ءَ کارکنانی بگیری ءَ وتگڑیں ایپ آئی آر کنگ بوگ ءَ اِنت ما ایشی گوں ترندیں دانکاں ایر جن ایں۔
آئی ءَ گوں اھوالکاراں دلگوش گور کرتگ ءُ گوشتگ کہ ما شمئے پارست ءَ واکدار ءَ دو روچ ءِ وھد ءَ دے ایں کہ آ پہ ابید اللہ تگاپی ءِ آجوئی ءَ سنگین بہ بنت ءُ بی وائی سی ءِ کارکنانی بگیری ءَ نبشتگیں ایپ آئی آر ءَ ھلاس بہ کن اَنت۔ اگاں داں دو روچ ءَ ابید اللہ تگاپی ء ھاجی برکت دیم ءَ آرگ ءُ نبشتگیں ایپ آئی آر ھلاس کنگ نہ بوت اَنت ما ترندیں گامگیج زور ایں۔
