بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں دوشی شال ءِ شھر ءَ یک کاروائی یے ءَ پاکستانی چیریں ادارہ ملٹری انٹیلیجنس ( ایم آئی ) ءِ نزیکیں کارمند میر زیب کمبرانی ء اھمد یار ھان کمبرانی کشتگ۔
آئی ءَ گوشتگ کہ ریاستی کارمند زیب کمبرانی دراجکشیں وھدے بیت کہ زورگریں پاکستانی لشکر ءِ چیردستی ءَ چاریگی ءِ کار ءَ کنگ ءَ بوتگ۔ ھمے کارمند پاکستانی لشکر ءُ چیریں ادارھانی وتگڑیں کشندہ ٹولی ءِ سروک سراج رئیسانی گون ءَ ھمگرنچ بوتگ۔ شال ءَ ھوار مستونگ ءَ پہ زورگریں لشکر ءَ مردم زورگ ءُ ھوار کنگ ءَ بوتگ۔
جارکش ءَ گوشتگ کہ چاریگ ءُ کمکار زیب کمبرانی گسانی سر ءَ بیڑ برگ، چادر ءُ چاردیولانی لگتمال کنگ ءُ بلوچ ورنایانی زوریں بیگواھی ءَ زورگریں لشکر ءِ کمکاری ءَ تچکی ءَ ھوار بوتگ۔ آ لس بلوچانی ترسینگ ءُ باجگری ءِ گرگ ءَ ھوار بوتگ، ایشی موکل زورگریں لشکر ءَ داتگ۔
آئی ءَ گوشتگ کہ ھمے ماہ ءِ دہ رمز ءَ بی ایل اے ءِ سرمچاراں دگہ یک کاروائی یے ءَ مستونگ ءِ ھند اسپلنجی مَرو ءَ ملنگ دروشمیں زورگریں پاکستانی لشکر ءِ دگہ یک چاریگے مجیب الرھمان ء ابدرھمان دزگیر کرتگ۔ آئی جست ءُ پرس ءِ میان ءَ منّ اتگ کہ پاکستانی چیریں ادارھانی کارمندانی گوں زیب کمبرانی ءَ آئی گند ءُ نند کناھینتگ، چہ ایشی پد آ زیب کمبرانی ءِ چیردستی ءَ چاریگی کنگ ءَ بوتگ۔
جارکش ءَ گوشتگ کہ ھمے کمکار ءَ منّ اتگ کہ زیب کمبرانی ءِ سروکی ءَ آئی سلمان کمبرانی ءُ گزین کمبرانی ءِ چاریگی کرتگ ءُ آیان ءَ زور بیگواہ کناھینتگ رند ءَ دروگیں میڑ ءَ شھید کنگ بوتگ اَنت۔
جیھند ءَ گوشتگ کہ زیب کمبرانی ءِ بلوچ راجدروھی ءِ سرزد بوگ ءِ سر ءَ بلوچ آمیدگس ءَ مرگ ءِ سزا گوشتگ، ایشی سر ءَ دوشی بی ایل اے ءَ کار کرتگ۔
