بالگتر: چہ کیلکور ءَ زورگریں پاکستانی لشکر ءِ دست ءَ زور بیگواہ کنگ بوتگیں بازیر کھول ءِ نیمگ ءَ سھاکی ءَ سی پیک دگ ءَ زھرشانی نندانک برجاہ اِنت۔
زھرشانی ءِ سوب ءَ دوئیں نیمگاں گاڑیانی مزنیں کتار اوشتوک اَنت۔ زورگریں پاکستانی لشکر ءِ جوڑ کرتگیں چیریں ادارھانی کارمنداں زھرشانی نندانک ءِ سر ءَ بیڑ برتگ ءُ مردم لٹ شاپ کرتگ اَنت۔ چہ پاکستانی لشکر ءِ نیمگ ءَ زوراکیاں ابید کھول ءِ نیمگ ءَ زھرشانی نندانک انگت برجاہ اِنت۔
کھول ءِ گوشگ اِنت دانکہ بازیز یل کنگ نہ بوتگ ما وتی زھرشانی نندانک ءَ برجاہ دار ایں۔ مارا چونیں ھم تاوانے بوت ایشی زمہ وار ریاست اِنت۔
یات بہ بہ اِت کہ بازیز گوستگیں روچاں چہ بالگتر ءِ ھند کیلکور ءَ پاکستانی لشکر ءَ آوار جتگ ءُ بیگواہ کرتگ۔ لشکر ءَ گس ءَ بیڑ برگ ءِ میان ءَ پاکستانی لشکر ءَ گوں مردماں زوراکی کرتگ ءُ چہ لٹ شاپ ءَ زھگ ءُ جنین ٹپی ھم بوتگ اَنت۔
ھمے روچ ءَ چہ کیلکور ءَ دگہ سے مردم پاکستانی لشکر ءَ آوار جتگ ءُ بیگواہ کرتگ اَنت، آ یل کنگ بوتگ اَنت بازیز انگت بیگواہ اِنت۔
بازیز ءِ آوار جنگ ءِ روچ ءَ آئی کھول ءَ سھاکی ءَ زھرشانی ءَ سی پیک دگ بند کرتگ اَت۔ چہ واکدار ءِ نیمگ ءَ دوچ ءِ تہ ءَ یل کنگ ءِ دلجمی ءَ کھول ءَ وتی زھرشانی ھلاس کرتگ۔
ھما روچ ءَ کھول ءَ گوشتگ اَت کہ اگاں داں 24 اکتوبر ءَ بازیز یل کنگ نہ بوتگ ما پد ءَ زھرشانی ءَ سی پیک دگ ءَ بند کن ایں۔
