پنجگور: زوریں بیگواھیانی بگیری ءَ چہ شھید جاوید چاراہ ءَ زھرشانی روانکے کشگ بوتگ آئی شھر ءِ جتائیں جاھاں ترّ ءُ گرد کرتگ۔ زھرشانی ءَ سیاسی ءُ چاگردی کارکن، نودربر، زھگ ءُ جنیناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
پہ زھرشانی روانک ءِ دارگ ءَ پولیس ءِ نیمگ ءَ اڑاند ودی کنگ ءِ جھد کنگ بوتگ، بلے زھرشانی کنوکیں مردماں وتی روانک گوں سوبمندی ءَ آسر کرتگ۔
آیاں گوشتگ کہ پنجگور واکدار ءِ نیمگ ءَ مئے ایمنیں زھرشانی روانک ءِ دیم ءَ اڑاند ودی کنگ ءِ مول مئے چیڑینگ بوتگ، بلے ما گوں ایمنی ءَ وتی زھرشانی برجاہ داشتگ ءُ آسر کرتگ۔
آیاں گوشتگ کہ چہ ایشی پیش اے باروا کجام کجام ھنداں زھرشانی کنگ بوتگ اَنت اود ءَ پولیس ءَ دزمانجنی کرتگ ءُ شھر ءِ موبائل نیٹورک ءُ دامگ بند کنگ بوتگ اَنت۔ مرچی اے کار پنجگور ءَ ھم کنگ بوتگ۔
بلوچ یکجھتی کمیٹی ءِ تکشام ”بے تواری ءِ پروشگ، زوریں بیگواھیانی بگیری ءَ اوشتگ“ ءِ بنگپ ءَ بلوچستان ءِ جتائیں ھند ءُ دمگاں زھرشانیانی درچ برجاہ اِنت۔ چہ ایشی پیش کراچی، ھب چوکی،ھزدار، تربت ءَ زھرشانی کنگ بوتگ اَنت، ھمے درچ ءَ مرچی پنجگور ءَ زھرشانی کنگ بوتگ۔
