بلوچ راجی زرمبشت ( بی این ایم ) ءِ پیشیگیں سرکماش ءُ بلوچ سروک رھیم ایڈوکیٹ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ ریاست ءِ ناشرکاری، ناھکی ءُ زوراکیانی بگیری ءَ بیگواھیں بلوچ پسگانی کھولانی توار ءِ دارگ ءَ پاکستان ھما زوراکی ءِ شونداتاں کہ کار گرگ ءَ اِنت آیاں سرجمیں جھان گندگ ءَ اِنت۔ من اے ریاستی ناشرکاری ءُ زوراکیانی سر ءَ چہ پاکستان ءَ ھچ وڑ ءَ گلگ نہ کن آں، چی ءَ کہ گلگ مردم چہ وتی یا چہ منگھیں ءُ راجمستری چاگرد ءُ ڈیھاں کنگ بیت۔ بلے پاکستان بلوچ ءِ نہ وتی اِنت ءُ نیکہ راجمستری ءُ منگھیں ڈیھ ءُ چاگردے۔ مردنی ئیں بلوچ جنین، زھگ، کماش ءُ ورنایانی گون ءَ پاکستان ءِ اے زوراکیانی ایر جنگ، ایشی بگیری ءَ توار چست کنگ ءُ جھد کنگ مئے درسانی سر ءَ ھژدری اِنت۔
آئی ءَ گوشتگ کہ بلوچ راجی آجوئی زرمبشت ءِ سلاہ بندیں پِڑ ءِ توانمندی ءُ بودناکیاں زورگریں ریاست ناگیگ کُرتگ، پریشانی ءُ سرگنوکوئی ھچ وڑ ءَ چیریں گپے نہ اِنت۔ بلے چہ زرمبشت ءِ راجمستری پِڑ، بزاں مردمی ھکانی بنکی ءُ آجوئیانی پھریزگ ءِ جھد ءَ زورگریں ریاست مدام ترس آماچ گندگ بوگ ءَ اِنت۔ ریاست ءِ ترس آماچی ءِ سوب ھمیش اِنت کہ زرمبشت ءِ راجمستری پِڑ مردمانی مچی، مراگش ءُ زھرشانیانی سْوب ءَ نہ تیوک ءَ زورگپتیں بلوچستان ءَ لشکر ءُ چیریں ادارھانی زوراکی ءُ چکچینی ءِ پاشک کنگ ءَ جوانیں کردے پیلو کنگ ءَ اَنت، بلکیں مردمانی یکجاھی ءُ زورگِر ءِ اے دروگ ءُ دروگیں درشاناں ھم پدر کنت کہ چہ ایشی ءَ ریاست ءِ سروک ءُ رسانکدر مدام بلوچ راجی آجوئی زْرمبشت ءَ ” چَنکے مردم” یا کہ چیزے دیمروئی ءِ بگیرداریں سردارانی ” ناشرکاری گْوش ایت ءُ ریاست ءِ کالونیل جوڑیشت،کِرد ءُ لُٹ ءُ پُل ءِ چیر دیگ ءِ جُھد ءَ کن اَنت۔
بلوچ سروک ءَ گوشتگ کہ پہ بیگواھیں مردمانی آجوئی ءَ بیگواھیں بلوچانی توار ( وی بی ایم پی ) ءِ زھرشانی گدان ءِ مدام ماندارگ یا زور بیگواھیں مردمانی کھولانی پریس کانپریس، مچی ءُ زھرشانیانی دارگ ءَ پولیس ءِ ناشرکاری ءُ زوراکی پندل ءِ کارمرز کنگ ءِ مول آیانی ترس آماچ ءُ دلگراں کنگ یا آیانی چیڑینگ اِنت۔ بلوچ زرمبشت ءِ راجمستری ءِ توانمنداں ریاست ءِ زوراکیاں ترسگی اِنت نہ کہ برانز گرگی اِنت، چے ءَ کہ ریاست ءِ اے پندل بلوچستان ءَ آئی ءِ نوآبادیاتی جوڑشت، زوراکی ءُ چہ آئی ءِ چھرگ ءَ اسلامی براس داری ءُ وتگڑیں راجمستری ءِ دپونکہ دور کنت ءُ آئی ءِ راستی ءَ پدر کنت۔ چہ ریاست ءِ چڑینگ ءِ آماچ نہ بیگ، چہ زور ءُ زوراکیاں تُرس آماچ یا دلپروش بیگ ءُ بے توار نہ بیگ پہ زْرمبشت ءِ راجمستری پِڑ ءَ مدام بنیادی چکاسے بیتگ۔ راجمستری جُھد ءِ راہ ھرچوں جنجال ءُ ناگیگ اِنت ھمے وڑ ءَ زورگریں ریاست ءِ میارباریانی پدر کنگ ءَ ھم گھتر اِنت۔
رھیم ایڈوکیٹ ءَ گوشتگ کہ زورگپتیں بلوچستان ءَ پاکستان ءِ زورگپتی، زوراکی، جنگی میارباری ءُ مردمگری ءِ بگیری ءَ ناشرکاریانی پاشک کنگ، بلوچانی بنیادی مردمی ھک ءُ آجوئی ءِ پھریزگ ءَ راجمستری پِڑ ءَ پُرکار بیگی اِنت۔ ھچ وڑیں باسما ءُ سرپدیں بلوچ نہ نہ زرمبشت ءِ راجمستری پِڑ ءُ راجمستری جھد ءِ بستار ءُ نپ ءَ رد کرت کنت ءُ نہ سلاہ بندیں پِڑ ءِ دیمونیاں میار ءُ باری یے لیک ایت، ھنچوش کہ اے باروا زورگریں دژمن ءِ جھد اِنت۔ بلوچ راج ءَ جھد ءِ ھچ پڑ، ھچ سنگر ءُ ھچ میدان پہ زورگریں ریاست ءَ یل کنگی نہ اِنت۔ آجوئی زرمبشت ءِ سوبمندی ءُ جھد ءِ لوٹ ھمیش اَنت۔
