مئے مروچیگیں جنگ تیوک ءَ پہ وتی سرڈگار ءَ نہ اِنت بلکیں پہ مئے منگہ ، ربیدگ ءُ پجار ءَ اِنت۔
لیپزگ ، جرمنی – بلوچ راجی زْرمبشت ( بی این ایم ) جرمنی تک ءِ کماش شرھسن ءَ ماں لیپزگ ءَ انیگیں روچاں بیتگیں مراگشے ءِ میان ءَ پہ بلوچ راجی آجوئی ءُ وتواجھی ءِ جھد ءَ میان راجی پلہ مرزی ءِ گیش کنگ ءِ لوٹ کرتگ۔
پوگ ھاؤس ءَ گپ جنان آئی ءَ بلوچ راج ءِ چک ءَ گْوستانکی زوراکی ءُ چہ پاکستانی مھترھند ءِ نیمگ ءَ مردمی اگبالانی برجاھیں بگیریانی سر ءَ دلگوش گْور کنائینتگ۔ آئی ءَ بلوچ ربیدگی پجار ءُ منگہ ءِ ارزشت ءِ سر ءَ زور داتگ کہ چہ بازیں دھکاں گار ءُ گمسارے ءِ ترس ءِ دیمپان اَنت۔
شرھسن ءَ گْوشتگ مئے مروچیگیں جنگ تیوک ءَ پہ وتی سرڈگار ءَ نہ اِنت بلکیں پہ مئے منگہ ، ربیدگ ءُ پجار ءَ اِنت کہ بازیں دھک اِنت تْرام اتگیں رنگے ءَ گار ءُ گور کنگ بیگ ءَ اَنت۔ اے جھد ءَ ما تیوک نہ ایں، مارا میان راجی پلہ مرز ھست چوش کہ مروچیگیں اے مچی ، مئے زْرمبشت ءَ پزور کنت ءُ تچکیں کلوھے شکسائیت : جھان گندگ ءَ اِنت ، ما چہ میان استمان ءَ لوٹ ایں کہ آ پہ مزدانک ءَ نہ ایوک ءَ مئے پریات ءَ گوش بہ دار ایت بلکیں آزات بلوچستان ءِ جنگ ءَ مئے پلو ءَ ھم بہ اوشت ایت۔
اے مراگشاں جتائیں راجانی مردماں بھر زرتگ ۔ شرھسن ءَ وتی گْوشتانک ءَ بلوچستان ءَ زھرشانی ءِ انیگیں دْرچ ءُ ماں زْرمبشت ءِ تہ ءَ جنینانی کرد ءِ سر ءَ ھم گپ جتگ۔ آئی ءَ میان استمان ءِ سر ءَ زور داتگ کہ آگاھی ودی بہ کنت ءُ بلوچ جھد ءِ پلہ مرزی ءَ دلجمیں گام بہ گیج ایت۔
چہ آئی ءِ گپاں پد ، مراگش ءَ ھواریں مردماں بلوچ زْرمبشت ءِ گْوستانکی پژدر ، زْرمبشت ءِ دیم ءِ اڑاند ءُ میان راجی پلہ مرزی ءِ گت ءُ گمانانی سر ءَ چہ آئی ءَ جست کرتگ۔
مراگش گوں ربیدگی نمائشے ءَ آسر بیتگ کہ آئی ءِ تہ ءَ بلوچی زیمر ءُ ناچ پیش دارگ بیتگ۔
