کراچی: بلوچ یکجھتی کمیٹی ءِ نیمگ ءَ زوریں بیگواھیانی بگیری ءَ بوتگیں زھرشانی ءِ سر ءَ پولیس ءَ بیڑ برتگ ءُ بلوچ یکجھتی کمیٹی ءِ سروک وھاب ءَ ھوار باز مردم دزگیر کرتگ اَنت۔
اھوالکار ءِ رد ءَ پولیس ءَ زھرشانی کنوکیں مردم ھما وھد ءَ دزگیر کرتگ اَنت کہ آ دیم پہ کراچی پریس کلب ءِ نیمگ ءَ روگ ءَ بوتگ اَنت۔ پولیس زینب مارکیٹ ءِ نزیک ءَ داشتگ اَنت ءُ زھرشانی کنوک لٹ شاپ کرتگ اَنت۔
بی وائی سی ءَ زھرشانی ءِ سر ءَ بیڑ برگ ءِ گپ راست کرتگ ءُ وتی درشان ءَ گوشتگ کہ سند پولیس ءَ مئے زھرشانی ءِ سر ءَ بیڑ برتگ ءُ بازیں مردم دزگیر کرتگ اَنت۔
جارکش ءَ گوشتگ کہ زھرشانی کنگ آیانی راھبند ءُ کانودی ھک اِنت اے چہ ریاستی ادارھانی نیمگ ءَ راجمستری ءِ بگیری اِنت۔
آئی ءَ لوٹ کرتگ ءُ گوشتگ کہ ایمنیں زھرشانی کنوک زوت یل کنگ بہ بنت اگاں نہ ما وتی زھرشانی ءَ دراجکش کن ایں گڑا ایشی زمہ وار سرکاری ادارہ اَنت۔
