بیگواھیں بلوچانی توار ( وی بی ایم پی ) ءِ کارگشاد سمی دین ءَ ماں رسانکدر ءَ وتی شنگ کرتگیں تامربندے ءَ گوشتگ کہ انوگیں روچاں بلوچستان ءَ ھوار کراچی ءَ بلوچ نودربرانی زوریں بیگواھی ءِ بگیری ءَ بلوچستان ءِ جتائیں ھند ءُ کراچی ءَ ھم زھرشانی کنگ بیت۔
آئی ءَ گوشتگ کہ کراچی ءَ باندا بیگاہ ءِ سے ءُ نیم ءَ کراچی پریس کلب ءِ دیم ءَ زھرشانی کنگ بوگ ءَ اِنت۔ کراچی ءَ ساڑی ئیں جتائیں بھرگاں سیادی داروکیں مردم اے زھرشانی ءَ بھر بزور اَنت ءُ زوریں بیگواھیانی بگیری ءَ توار چست بہ کن اَنت۔
