اے تر ءُ تاب ءِ میان ءَ 27 کسانی سر ءَ دو نوکیں بنزہ ھم جوڑ کنگ بیتگ۔
بلوچ راجی زْرمبشت ( بی این ایم ) مشکے آواران ھنکین ءِ سرکماش استاد مھران ءَ ھنکین ءِ جتائیں بنزھاں تر ءُ تاب کرتگ۔ اے میان ءَ آئی ءَ 27 کسانی سر ءَ دو نوکیں بنزہ ھم جوڑ کرتگ ، اے بنزھاں شھید الی جان ءُ شھید آگا آبد شاہ ءِ نام دیگ بیتگ۔
وتی تر ءُ تاب ءِ میان ءَ نام گپتگیں ھنکین ءِ سرکماش ءَ ڈیھی ، دمگی ءُ جھانی جاورانی سر ءَ گوں گل ءِ باسک ءُ دوزواھاں گند ءُ نند ءُ ماں نیاداں تْران کرتگ۔
آئی ءَ گْوشتگ بلوچ راج چہ شول کشیں باریگے ءَ زورگرانی بگیری ءَ پہ وتی مانشت ءُ گلزمین ءِ پھریزگ ءَ جنگ ءَ اِنت ، گْوستگیں زمانگ ءَ بلوچ دری ارش کنوکانی دیم ءَ وتی مانشت ءُ سر ڈگار ءِ پھریزگ ءَ سوبمند بیتگ ۔ بلے 27 مارچ 1948 ءَ پد بلوچ راج انچیں دژمنے ءَ دیم پہ دیم اِنت کہ چہ گْوستگیں پرتگیز ءُ انگریزیں زورگراں جتا اِنت۔ اے جنگ ءِ پڑ ءَ سکا ترسوک ءُ نزوریں لشکرے بلے مکاری ، دو تل ءُ دو پوستی ءُ زوراکی ءَ کس گوں ایشی ءَ نہ رس ایت۔
استاد مھران ءَ گْوشتگ اے مھترھند ءَ اسلام ءِ نام ءِ سر ءَ بلوچ ءُ دگہ چیردستیں راجانی مڈی دستیگ کرتگ اَنت۔ اے بھ پدریں رنگے ءَ گوں وتی راستیں من ءُ مولاں بلوچ ءِ دیم ءَ نئیت بلکیں مدام باپشت ءَ ارش کنت۔
آئی ءَ گل ءِ باسکانی جستانی پسو داتگ ءُ گْوشتگ بی این ایم دلجمیں رنگے ءَ کار ءَ اِنت۔ بی این ایم ءِ سروکاں مدام گل ءُ زْرمبشت ءِ دیمروئی ءَ دیمونی داتگ ءُ شپ ءُ روچ کار کرتگ۔ گل ءِ مراگش بیگ ءَ اَنت ءُ گل تْرام اتگیں رنگے ءَ برجاہ اِنت۔
آئی ءَ گْوشتگ چہ مھترھند ءِ نیمگ ءَ بی این ایم ءِ سر ءَ بیڑ برگ بیتگ چہ ایشی ءَ گل سھرائیں رنگے ءَ سیاست کرت نہ کنت، اگاں مروچی ما ڈن ءَ در بہ یا این ءُ بی این ایم ءِ نام ءَ بہ گر ایں پہ ما جیڑہ ودی بیت کنت بلے چہ ایشی ءَ پد ھم گل بلوچستان ءِ ھرچ دمگ ءَ ھست اِنت۔ گْوستگیں دو سال اِنت بی این ایم مشکے ۔ آواران ھنکین یکشل ءَ کار کنگ ءَ اِنت کہ آئی ءِ برورد مئے شمئے دیم ءَ اِنت۔ گل ءِ بازیں باسک سرگرم اِنت ءُ وتی زمہ واریاں پیلو کنگ ءَ اِنت۔
آئی ءَ گْوشتگ گلءِ تْراموک ، داروک ءُ مھکم کنوک مردم اَنت ، ھمے پیم ما گوں بی این ایم ءَ ھوار بہ این ءُ پہ آئی ءِ مولاں کار کن ایں گڑا بی این ایم مھکمیں گلے جوڑ بیت۔ مھکمیں بی این ایم پمیشکا ھم المی اِنت کہ مھکمیں بی این ایم مھکیں بلوچ زْرمبشت ءِ مانزمان اِنت۔
ھنکین ءِ سرکماش ءَ بی این ایم ءِ نوک جوڑ بیتگیں باسکاں گپ جنان ءَ گْوشتگ زْرمبشت ءِ کار یک دومی ءِ سر ءَ یلہ کنگ نہ بہ اَنت بلکیں چہ ما ھریکے ءَ وتی زمہ واری پیلو کنگی اَنت۔ بی این ایم تیوک ءَ یک سن ءُ سال ، جنین یا مردین ، یا یک ٹک ءُ کارے ءَ بندوکیں مردمانی گلے نہ اِنت بلکیں اے سرجمیں بلوچ راج ءِ گل اِنت مارا ھر یکے ءِ گْور ءَ وتی کلوہ سر کنگ ءُ اے گل ءِ بھر جوڑ کنگی اِنت۔
