کراچی: زی پاکستانی لشکر ءِ دست ءَ زور بیگواہ کنگ بوتگیں نودربرانی کھول ءَ کراچی پریس کلب ءَ پریس کانپریس کرتگ ءُ گوشتگ کہ ما مرچی پہ وتی زور بیگواھیں آزیزانی باروا اد ءَ ساڑی ایں کہ آیان ءَ زی 16 اکتوبر ءَ سی ٹی ڈی لشکر ءَ درکانودی آوار جتگ ءُ بیگواہ کرتگ۔ مئے آزیز نو بلوچ نودربر اَنت زور بیگواہ کنگ بوتگ اَنت۔ شئیب الی ء بکتیار جاہ منند پسنی، کراچی زانشتجاہ ءَ تاریک ءِ نودربر اِنت، ھنیپ ء بدل جاہ منند ھورماڑہ، اردو زانشتجاہ ءِ نودربر اِنت، اشپاک ء ھالک داد، جاہ منند گریشگ ھزدار دینی مدرسہ ءِ نودربر اِنت۔ شھزاد ء ھالد گریشگ ءِ جاہ منند اِنت ءُ دینی مدرسہ ءِ نودربر اِنت۔ بیبگر امیر ء امیر بکش وشبود پنجگور ءِ جاہ منند اِنت کراچی زانشتجاہ ءَ تاریک ءِ نودربر اِنت۔ زبیر ء کریم بکش مند کیچ ءِ جاہ منند اِنت، انٹرمیڈٹ ءِ نودربر اِنت۔ کمبر ء مسکان گریشگ ھزدار ءِ جاہ منند انٹرمیڈٹ ءِ نودربر اِنت۔ سید اللہ ء درمھمد گڈانی ءِ جاہ منند اِنت کراچی زانشتجاہ ءَ لا ءِ نودربر اِنت۔ مھمد جاوید ء لال بکش کراچی زانشتجاہ ءَ تاریک ءَ نودربر اِنت۔ ھشت نودربر مردمانی دیم ءَ بیگاہ ءِ پنچ ءُ نیم ءُ شش ءِ میان ءَ سی ٹی ڈی پولیس مزنیں کچے ءَ دہ دوازدہ گاڑیانی سر ءَ آتکگ، آیانی تہ ءَ لھتے وردی ءُ گیشتر سادگ پوشاکیں مردم بوتگ اَنت۔ آیاں درسیں نودربر چہ گلشن اکبال ءِ ھند بشیر ویلج ءَ یک ماڑی یے ءِ جتائیں کوٹیان آوار جتگ ءُ بیگواہ کرتگ اَنت۔
آئی ءَ گوشتگ کہ مئے زھگ اے ڈیھ ءَ ھچ جاہ ءَ پھریز نہ اَنت، کودک ءُ بے میاریں نودربر بے نیمون ءَ درکانودی آوار جتگ ءُ کراچی سی ٹی ڈی ءَ بیگواہ کرتگ اَنت ءُ دومی روچ ءَ چہ آیانی کوٹیاں لپٹاپ ءُ آدگہ سامان برتگ اَنت۔ وھدے کہ ما پولیس ءِ کِر ءَ پہ ایپ آئی آر ءَ شتگ ایں گڑا آیاں مئے پریاد گوش نہ داشتگ ءُ تچک ءَ مکن کرتگ کہ آ وتی ادارھانی نام ءَ ایپ آئی آر نبشتہ نہ کن اَنت۔ وھدے کہ اے ڈیھ ءِ کانود ءِ پھاز دار درکانودی کودکیں شھریاں آوار جن اَنت ءُ بیگواہ کن اَنت گڑا ما پہ انساپ ءِ لوٹ ءَ کج ءَ برو ایں؟ زاناں ما اے ڈیھ ءِ شھری نہ ایں؟ اے ڈیھ ءَ مارا شھری بوگ ءِ ھچ وڑیں ھچ ھک نیست۔ مارا اے ھک نیست کہ پہ وتی آزیزانی سلامتی بابت ءَ جست بہ کن ایں۔ مارا ھمنچو بہ گوش اِت کہ آ کجام میارباری ءِ بنیاد ءَ گراں کنگ ءُ زور بیگواہ کنگ بوتگ اَنت، آیانی میار ھمیش اِنت بلوچ اَنت؟
آئی ءَ گوشتگ کہ ما مرچی وتی پریاد اد ءَ آورتگ کہ مئے گپ گوش دارگ ءُ داں ادارھاں سر کنگ بہ بیت۔ آیاں مئے آزیز بے میار ءَ درکانودی آوار جتگ ءُ بیگواہ کرتگ اَنت۔ ما گوں مردمی ھکانی ادارھاں لوٹ کن ایں کہ آ اے درکانودی کار ءِ بگیری ءَ توار چست بہ کن اَنت ءُ پہ مئے آزیزانی آجوئی ءَ مارا کمک بہ کن اَنت۔
