بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں ھبدہ اکتوبر پنچ شمبے ءِ نمیروچ ءَ کولواہ ءِ ھند شاہ ءُ باتل ءَ سنگر گپتگ ءُ پاکستانی لشکر ءِ کارمندانی سر ءَ اُرش کرتگ۔ اُرش ءَ مزن ءُ نوکیں سلاہ کارمرز کرتگ اَنت ایشی زد ءَ آھگ ءَ سے پاکستانی لشکر ءِ کارمند مرتگ ءُ دو ٹپی بوتگ اَنت۔
آئی ءَ گوشتگ کہ اے اُرش ھما وھد ءَ کرتگ کہ پاکستانی لشکر ءِ کارمند پہ بنجل ءَ راشن بروکیں گاڑیانی پھازداری ءَ اوشتوک بوتگ اَنت۔ اُرش داں بیست دمان ءَ برجاہ بوتگ۔
جارکش ءَ گوشتگ کہ بی ایل ایپ ءِ انٹیلیجنس ءِ ھال دیگ ءَ سرمچاراں پیسر ءَ راہ ءِ سر ءَ سنگر گپتگ ءُ دژمنیں لشکر ءِ سر بوگ ءَ ترندیں تیرگواری کرتگ ءُ آیان ءَ جانی ءُ مالی تاوان داتگ۔
آئی ءَ گوشتگ کہ چہ سرمچارانی سوبمندیں اُرش ءَ پد ترس آماچ بوتگیں لشکری کارمنداں لس آبادیانی سر ءَ تیرگواری کرتگ ایشی زد ءَ یک زھگے آتکگ روشن ء پکیر ٹپی بوتگ۔
جارکش ءَ گوشتگ کہ بی ایل ایپ بلوچستان ءِ جتائیں ھنداں مردمانی پلہ مرزی ءُ انٹیلیجنس ءِ ھال دیگ ءَ وتی کاروائیاں پیلو کنت ءُ مرچیگیں کاروائی ھم سرجم ءَ انٹیلیجنس ءِ ھالانی بنیاد ءَ بوتگ۔
میجر گھرام ءَ اُرش ءِ زمہ واری منّ اتگ ءُ گوشتگ کہ داں بلوچستان ءِ آجوئی ءَ کاروائیانی برجاہ دارگ ءِ کول ءَ کن ایں۔
بنشون: درشان / اکس: زرمبش 
