کراچی: بلوچ یکجھتی کمیٹی ءِ سروک ڈاکٹر ماہ رنگ ءُ بیگواھیں بلوچانی توار ( وی بی ایم پی ) ءِ کارگشاد سمی دین ءَ کراچی بار ایسوسی ایشن ءِ وکیلانی پروگرامے ءَ بھر زرتگ۔ ھمے میان ءَ سرکاری ھال ءِ لین بند کنگ بوتگ اَنت ءُ پروگرام ءِ ھراب کنگ ءِ سر ءَ وکیلاں ماہ رنگ ءُ سمی دین ءِ ھک ءَ اوگام جتگ۔
رند ءَ وکیلاں ڈاکٹر ماہ رنگ ءُ سمی دین ءَ تلو ءِ سر ءَ برتگ اود ءَ تران کنان ءَ ڈاکٹر ماہ رنگ ءَ گوشتگ کہ مرچی آمیدگسانی تہ ءَ نشتگیں ججاں شھرمند انساپ دیگی اَنت آ لشکری جارکش جوڑ بوتگ اَنت۔
آئی ءَ گوشتگ کہ ریاست ءِ ناشری ءُ زوراکی بلوچستان ءَ پاشک بوتگ اَنت اگاں ریاست بلوچستان ءَ چنچو بلین ڈالر ھرچ بہ کنت آ ھونریچی کنگ ءَ اِنت بلوچستان ءِ دمک ءُ درانی تہ ءَ آیاں چیر کرت نہ کنت۔
ڈاکٹر ماہ رنگ ءَ جج شرگداری کرتگ اَنت ءُ گوشتگ کہ مرچی بلوچ مات کہ آیانی زھگ ریاستی ادارھاں کشتگ ءُ آیانی ژانگولیں لاش چگل داتگ اَنت۔ آ اے نہ گوش اَنت مئے گون ءَ انساپ بہ کن ءُ مئے زھگانی کشندھاں سزا بدے، آ ھمے لوٹ ءَ کن اَنت کہ مارا آیانی پجار ءَ بہ گوش اے منی زھگ اِنت یا ناں۔
آئی ءَ گوشتگ کہ اے ویلانی پہ انساپ دیگ ءَ نشتگیں ججاں مارگ لوٹ ایت کہ شمئے بستار انچو ھلاس اِنت آ مات مرچی چہ شما انساپ نہ لوٹ اَنت بلوچ مات وتی گون ءَ وت انساپ کن اَنت۔
ڈاکٹر ماہ رنگ ءَ گوشتگ کہ بلوچ جنین بلوچستان ءِ ھما جنگ ءَ مڑگ ءَ اِنت کہ آھوکیں وھداں یک سکا مزنیں زرمبشتے ودی بیت۔
آئی گوشتگ کہ پانزہ پانزہ سال اِنت کہ بلوچ، سندی، پشتون ءُ ھمک لس شھری کاینت ءُ ججانی دیم ءَ پہ وتی زھگاں پریات کن اَنت منی زھگ ءَ بیار، بلے ججانی زرد جاہ نہ جنت۔
