پنجگور: زورگریں پاکستانی لشکر ءِ دست ءَ زور بیگواہ کنگ بوتگیں برات آبد نور ءُ سابر ءِ کھول ءَ وتی شنگ کرتگیں درشانے ءَ گوشتگ کہ آبد نور ءُ سابر نور ءَ 30 سمبر ءِ سھب ءَ پاکستانی لشکر ءَ چہ گِس ءَ آوار جتگ ءُ بیگواہ کرتگ اَنت۔
آئی ءَ گوشتگ کہ وھدے ما پہ وتی آزیزانی آجوئی ءَ زھرشانی ءَ نشتگ ایں گڑا مکُران دمگدار ءَ کول کرتگ کہ بیست ءُ چار ادارانی تہ ءَ دوئیں برات آجو کنگ بنت ما وتی زھرشانی نندانک ھلاس کرتگ۔ آ گپ ءَ مرچی دہ روچ گوستگ بلے دوئیں برات انگت یل کنگ نہ بوتگ اَنت۔
کھول ءَ گوشتگ کہ ما یکبرے پد ءَ گوں پنجگور دمگدار، دمگی واکدار ءُ مکران دمگدار ءَ بیست ءُ چار ادار ءِ وھد ءَ دے ایں، اگاں بیست ءُ چار ادارانی تہ ءَ آبد ءُ سابر یل کنگ نہ بوت اَنت گڑا ما ترندیں گامگیج زور ایں۔ ما آھوکیں بیست ءُ چار ادارانی تہ ءَ آھوکیں گامگیج ءِ جار ءَ جن ایں۔
