مروچی بلوچ راج ءِ گپ یک ڈک اِنت ءُ مئے منزل آجوئی اِنت۔
ڈاکٹر نسیم بلوچ ءَ گْوشتگ سندی راج ءِ جیڑہ ھم بلوچ ءِ پیم ءَ مردمی اگبالانی نہ اِنت بلکیں راجی آجوئی ئیگ اِنت۔ پہ زیردستیں راجاں مردمی اگبالانی لوٹ انچائیں گپے پرچا کہ زیردستی ءِ جاور ءَ اگبالانی گپ رد دیگے ۔
اے گپ بلوچ راجی زْرمبشت ( بی این ایم ) ءِ سرکماش ءَ جھانی سندی کانگریس ءِ چیردستی ءَ سندھ ءِ بارہ ءَ 36 می میان استمانی کانپرنس ءَ درشانتگ اَنت۔
آئی ءَ گْوشتگ سندی ءُ بلوچ سرڈگار مروچی چہ درد ءَ چکار اَنت بلے ما دلپروش نہ ایں۔ اے گواچن بیتگ کہ مئے راجی مزرو تچک اِنت، ءُ مروچی جھان ءِ دیم ءَ ، مئے راج ءِ دیم ءَ ، ہاکستان ءِ زوراکی پدر اَنت۔وھدے مھترھند ( ریاست ) زوراکی کنت گڑا اے ھمے گپ ءِ مناک بیت کہ زیر دستیں راج بہ ھل اِت کہ گندگ ءَ زیردست اِنت بلے راستی ءَ مھترھندی لشکر ءِ ترس ئِے پروش داتگ۔مروچی مردم ڈن ءَ در کپگ ءَ اَنت ، وتی توار ءَ چست کنگ ءَ اَنت ، ءُ گھگیری مردمانی روان ( نفسیات ) ءِ بھر جوڑ بیان اِنت ، ھمے مئے سوب اِنت۔
بی این ایم ءِ سرکماش ءَ گْوشتگ پہ ھم سنتی ءَ ایوک ءَ گپ ءُ بٹال نہ لوٹ ایت بلکیں یکسانیں کرد ءُ کار المی اِنت۔ ما ھم سنتی ءِ سیتاں شری ءَ زان ایں بلے مئے ھم سنتی ءِ روتگ مئے کرد ءُ کاراں پنھان اَنت۔وھدے مئے کرد ءُ کار ءُ مئے منزل ءِ تچکیں راہ گیش اَنت گڑا کار ءُ کرد ءِ پڑ ءَ ھمدست بیگ ءُ درد ءُ رنجانی بھر کنگ الم بیت۔
آئی ءَ گوں پاکستان ءَ نوکیں چاگردی مسامے ءِ گت ءُ گمان رد کرتگ ءُ گْوشتگ لھتے کْوھنیں سیاستداں مارا پہ نوکیں چاگردی مسامے ءِ موچکین ءَ وادار کنگ ءِ کوشست ءَ اِنت، بہ گند ئے سند ءَ اے بارہ ءَ گیشتر گپ بیگ ءَ اِنت۔ اے لٹ ءُ پلی تْرام ءِ برجاہ دارگ ءِ نوکیں وڑے بلے مارا وتی پاد میھ کنگی ءُ وتی راج اے سرپد کنگی اِنت کہ رد مہ کپ اَنت ، پرچا کہ زیردستی ءِ ھچ تْرام ءِ تہ ءَ راست ءُ دلجمیں مٹی نیئت داں آجوئی ءُ وتواجھی مہ رس ایت۔
ڈاکٹر نسیم ءَ گْوشتگ زورگر آجوئی لوٹوکاں دیمروئی ءِ دشمن لیک ایت بلے راستی ایش اِنت کہ زورگر ءَ بھ زیردستیں راج دیمروئی نہ داتگ اگاں زورگراں دیمروئی بہ داتیں گڑا برتانیا کہ زانشت ءُ نوکانی (جدیت ) ءِ پڑ ءَ جھان ءِ چہ درستاں دیمروئی کرتگیں چاگرداں یکے اَت ، آئی ءَ پرچا ھندوستان دیمروئی دات نہ کرت ؟
آئی ءَ گْوشتگ آجوئی ءُ دیمروئی یورپ ءَ ھم رائیگان ( مپت ) نہ رس اتگ۔ آیاں ھم تھاریں زمانگے دیستگ ءُ چہ ھونانی جواں گْوستگ اَنت مارا ھم پہ نادلکشی ھمے راھاں چہ ھونانی جواں گْوزگی اِنت۔ مارا گوں گیشتریں وس ءُ واک ءَ ککار ءُ چیھال کنگی اِنت، گیشتر درد ءُ دور سگگی اِنت پرچا کہ مئے دشمن گیشتر زوراک اِنت۔ مئے دشمن ءِ لشکر مزھبی گنوکیں رسترے ، کہ آ وتی ستک ءُ باور ءِ رد ءَ مئے چکچینی ءَ وتی ڈبو زانگ ءُ کنگ ءَ اِنت۔
آئی ءَ زیردستیں راجانی سیاستدان ءُ نبشتہ کاراں گْوشتگ کہ آ چہ زورگر ءِ روان ءُ ربیدگی سان ءَ در بہ کپ اَنت۔ چہ پاکستان ءَ پیش سند ءُ بلوچستان ءَ ھچ رنگیں کمتریں مردمی رمبے ( اقلیت) نہ بیتگ اگاں کسے ھندویے بیتگ یا دگہ دین ءِ منوگرے بلے آ ماں وتی گلزمین ءَ گوں دگراں برابر ءِ شھری یے منگ بیتگ اَت۔ مروچی پاکستانی سیاست ءِ رندگیری ءُ سان ءَ ما آیاں چاگرد ءِ کمتریں بھر گْوشگ ءَ ایں ، چہ ایشی ءَ پھریز کنگ لوٹ ایت۔
