بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے دکی ءَ 21 پشتون مزدورانی کوش ءَ ایر جنت ءُ اے گپ ءَ تچک کنت کہ اے دردناکیں ویل ءَ مئے گل ءِ ھچ وڑیں ھمگرنچی نیست۔ اے کشت ءُ کوش پاکستانی لشکر ءُ چیریں ادارہ ءُ آئی مکاریں شوربندیانی بھر اِنت۔ ھمیشی پارست ءَ براتیں راج بلوچ ءُ پشتوناں وت ماں میڑینگ ءِ پندل سازگ بوگ ءَ اِنت۔ بی ایل اے گوں تچکیں لبزاں اے کشت ءُ کوش ءِ زمہ وار پنجاپی ریاست پاکستان ءَ لیک ایت ءُ تچکی ءَ گوش ایت کہ چہ دژمن ءَ اے بے میارانی کوش ءِ ھساب الم گرگ بیت۔ بلوچ ءُ پشتون راج ھواریں دژمن ءِ بگیری ءَ یک جنگے ءِ سر ءَ گیشتر مھکم بنت ءُ زوت یا دیر پنجاپی ریاست ءَ پروش دے اَنت۔
جارکش ءَ گوشتگ کہ بی ایل اے ءِ سرمچاراں سامی ءُ تربت ءَ دو جتائیں اُرشاں زورگریں لشکر ءُ یک لشکری چاریگ ءُ کمکارے نشانگ کرتگ۔
آئی ءَ گوشتگ کہ بی ایل اے ءِ سرمچاراں دوشی کیچ ءِ ھند سامی ءَ زورگریں پاکستانی لشکر ءِ مزنیں بنجل گوں یک ارشے ءَ نشانگ کرتگ۔ سرمچاراں گرنیڈ لانچر ءِ باز گولا آس داتگ ءُ گوں وتکاریں سلاھاں دژمن نشانگ کرتگ۔ اُرش ءَ کم چہ کم سے دژمنیں کارمند ٹپی بوتگ اَنت، وھدیکہ آئی ءَ گیشتر جانی ءُ مالی تاوان بوتگ۔
جارکش ءَ گوشتگ کہ ھمے وڑ ءَ دگہ یک کاروائی یے ءِ میان ءَ بی ایل اے ءِ سرمچاراں تربت شھر ءَ ماھیگ مارکیٹ ءِ نزیک ءَ یک اُرشے ءَ پاکستانی لشکر ءِ کمکار ملا یاکوب پنام کریشی کشتگ۔
آئی گوشتگ کہ اے لشکری کمکار مسالہ بھا کنگ ءِ دروشم ءَ پاکستانی لشکر ءُ پہ آئی ملٹری انٹیلیجنس ( ایم آئی) ءَ چاریگی ءِ کار ءَ کنگ ءَ بوتگ۔
جارکش ءَ گوشتگ کہ ملا یاکوب پنام کریشی ایم آئی ءِ کارگس ءَ روگ ءَ ھوار شھر ءَ زورگریں لشکر ءِ زوراکیانی میان ءَ گوں لشکر ءَ گندگ بوتگ۔ تربت شھر ءِ کِر ءُ کشاں اے مردم پہ زورگریں لشکر ءَ چاریگی کنگ ءِ ھواری ءَ پہ دژمنیں لشکر ءَ چاریگ زورگ ءِ کار ءَ بوتگ۔
جیھند ءَ اے دوئیں ارشانی زمہ واری منّ اتگ ءُ گوشتگ کہ زورگریں لشکر ءِ چہ بلوچستان ءَ سرجم ءَ درآھگ ءَ مئے جنگ برجاہ بیت۔
