بلوچ جھد تیوک ءَ یک ھندی جیڑھے نہ اِنت، بلکیں میان استمانی مردمی ھکانی ءُ انساپ ءِ جیڑہ اِنت۔
بلوچ راجی زرمبشت ( بی این ایم ) ءِ جھگیر سمل ءَ جنیوا اکوام متھدہ ءِ مردمی ھکانی کونسل ( یو این ایچ آر سی ) ءِ پنجاہ ءُ ھپتمی نیاد ءَ تران کرتگ ءُ بلوچ راج ءِ بگیری ءَ پاکستان ءِ نیمگ ءَ بیوکیں مردمی ھکانی ناھکیں بگیری آشکار کرتگ اَنت۔ آئی ءَ زوراکی ءُ ناھکیانی سرجمیں سرپدی داتگ اَنت، بلوچستان ءَ انوگیں جاورانی سر ءَ میان استمانی دلگوش ءُ اے باروا زوت کاروائی کنگ ءِ لوٹ کرتگ۔
وتی گپانی میان ءَ سمل ءَ مزنیں کچے ءَ بیوکیں زوریں بیگواھیانی سر ءَ تران کرتگ ءُ گوشتگ کہ بلوچستان ءَ ھزارانی کچ ءَ بلوچ شھرمنند پاکستانی لشکر ءَ آوار جتگ اَنت آیانی باروا ھچ ھال نیست۔
آئی ءَ بلوچ مردمی ھکانی گل پانک ءِ کچ ءُ کساسانی درور داتگ آئی رد ءَ جنوری 2024 ءَ بگر داں جون 2024 ءِ میان ءَ 269 مردم کہ آیانی تہ ءَ مرد، جنین ءُ زھگ ھوار اَنت آوار جنگ بوتگ اَنت۔ دگہ 25 مردم درکانودی کشگ بوتگ ءُ 160 آزارانی نشانگ کنگ بوتگ اَنت۔
آئی ءَ اے کاروائی پاکستان ریاست ءِ نیمگ ءَ بلوچ راج ءِ وتواکی ءِ جھد ءِ دارگ ءِ یک مزنیں کوشستے ءِ بھر لیک اِتگ اَنت۔ لشکری زور ءِ کارمرز کنگ، نشانگ کنگ ءُ دارگ ءِ ھیلہ کسانیں ویل نہ اَنت بلکیں بلوچ راج ءِ پہ بے توار کنگ ءَ تکشام ءِ بھر اَنت۔
سمل ءَ پیش داشتگ کہ ریاستی گامگیج نہ تیوک ءَ سیاسی کارکن بلکیں لس شھریاں نشانگ کنگ ءَ اَنت، چہ ایشی بلوچستان ءَ ترس ءُ زوراکی ءِ توانے برجاہ اِنت۔
ایشی بگیریانی سکا باز منانک ھست اَنت، آئی میان استمانی پژدر ءِ کمی ءِ سر ءَ بژن درشان کرتگ ءُ میان استمانی ادارھانی نیمگ ءَ بلوچ ءِ چہ تباھی ءَ رکینگ ءَ کاروائی کنگ ءَ بے سوبی ءِ گپ جتگ۔
آئی ءَ گوشتگ کہ مردمی ھکانی اے بگیری چکچینی زانگ بیت۔ میان استمانی تک مزنیں کچے ءَ مان آرگ ءَ نہ اِنت، جھان ءِ بے کردی بلوچ راج ءِ گون ءَ یک مزنیں ناھکی یے۔
وتی تران ءِ گڈی ءَ سمل ءَ اکوام متھدہ ءُ گوں میان استمانی تک ءَ لوٹ کرتگ کہ آ بلوچستان ءَ ناشریں گامگیج ءِ باروا پاکستان ءَ جست بہ کن اَنت۔ آئی ءَ اکوام متھدہ ءِ جنرل اسمبلی زور داتگ کہ آ یک کرار دادے بہ منّ ایت چہ ایشی بلوچ راج ءِ سر ءَ پاکستان ءِ نیمگ ءَ برجاھیں زوراکیانی بگیری ءُ آجو ءُ وتواکیں بلوچ ریاست ءِ برجاھی ءِ پلہ مرزی ءَ بہ کنت۔ اے وڑیں گامگیج برجاھیں چہ زوراکیانی دارگ ءُ بلوچانی پہ وتواکی ءِ برجاہ دارگ ءَ دلجمی دیگ ءَ جوانیں گامگیجے۔
سمل ءَ وتی گوشتانک ءَ بلوچستان ءَ مردمی ھکانی ناگیگیں جاور پیش داشتگ اَنت، بلوچ راج ءِ یکشلیں آزاردھی ءُ چہ زوراکیاں پھریزگ ءَ دزمانجنی ءِ لوٹ کرتگ۔
آئی ءَ گوشتگ کہ بلوچ جھد نہ تیوک ءَ یک ھندی جیڑھے بلکیں میان استمانی مردمی ھک ءُ انساپ ءِ جیڑہ اِنت۔
