شال: پہ زور بیگواھیں مردمانی پدجنگ ءَ وی بی ایم پی ءِ نیمگ ءَ شدکشیں زھرشانی گدان ءَ 5591 روچ سرجم بوتگ۔ دوشمبے ءِ روچ ءَ چہ پنجگور ءَ سیاسی ءُ چاگردی کارکن گلام جان، نور اھمد ءُ دستگیر پہ ھمدردی ددشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پر ایمنیں جھد بلوچانی زندگی ءِ بھرے جوڑ بوتگ۔ بلوچستان ءَ پاکستانی لشکر، چیریں ادارھانی کارمند ءُ زرگپتیں کشندھانی نیمگ ءَ سرجمیں بلوچستان ءَ زوراکی تیز کنگ بوتگ۔ اے وھد ءَ زوریں بیگواھی ءُ ژانگولیں لاشانی چگل برجاہ اِنت۔
آئی ءَ گوشتگ کہ زورگر ءُ آئی ناشرکارانی زوراکیاں بلوچ پسگ چہ وتی گرانبھائیں راجی مول ءَ یک گامے پشت نہ کنز اتگ۔ زور بیگواھیں مردمانی کھول ھمک روچ چہ وتی زھرشانیاں ھمے کلوہ ءَ دیگ ءَ اَنت کہ بلوچ راج پہ وتی ایمنیں جھد ءُ چہ دیمونی ءِ جوزگ ءَ مھکم اِنت۔ آ پہ وتی زرمبشت ءَ ھر وڑیں زوراکیانی دیم پہ دیمی کنگ ءَ جاڑیگ اَنت۔ پاکستانی ادارھاں بلوچستان ءَ وتی زوراکی تیز کرتگ اَنت۔
ماما کدیر گوشتگ کہ گوستگیں یک ماھے ءِ تہ ءَ سدانی کچ ءَ وانندگیں بلوچ ورنا زور بیگواہ کنگ بوتگ اَنت ءُ لاشانی چگل دیگ ءِ درچ برجاہ اِنت۔ چوش کہ میان استمانی ادارھاں ھمے کلوہ ءَ دیگ ءَ اَنت کہ پاکستان جھان ءِ مردمی ھکانی ءُ اے دمگ ءَ ایمنی ءِ جھد ءَ ھوار میان استمانی راھبنداں ھچ بستار نہ دنت کہ اے پہ میان استمانی جھان ءَ یک بژنی گپے اِنت۔
