شال: زورگریں پاکستانی لشکر ءِ دست ءَ زور بیگواہ کنگ بوتگیں نور آلم مری ءِ کھول ءِ نیمگ ءَ زھرشانی روانکے کشگ بوتگ۔ روانک ءَ زور بیگواھیں مردمانی کھول سیاسی ءُ چاگردی کارکناں ھوار مردماں بازیں کچے ءَ بھر زرتگ۔
زھرشانی روانک چہ بیگواھیں بلوچانی توار ( وی بی ایم پی ) ءِ زھرشانی گدان ءَ در کپتگ ءُ جتائیں دگاں ترّ ءُ گرد کنگ ءَ پد ادالت دگ ءَ مچ بوتگ اَنت۔
زھرشانی کنوکیں مردماں اوگام جتگ ءُ زوریں بیگواھی ءِ گِر ءُ دار کنگ ءُ پہ درسیں زور بیگواھیں مردمانی آجوئی ءَ لوٹ کرتگ۔
آیاں تران کرتگ ءُ گوشتگ کہ نور آلم مری ءَ 7 سال اِنت زور بیگواہ کنگ بوتگ کہ انگت ءَ بیگواہ اِنت، آئی ھچ وڑیں ھال نیست کہ چون ءُ کج ءَ اِنت۔
آئی ءَ گوشتگ کہ نور آلم مری ء دلشاد مری چہ مرچی ءَ ھپت سال پیش لشکرکشی ءِ میان ءَ گس ءَ آوار جتگ ءُ بیگواہ کنگ بوتگ۔ آئی پیرزالیں مات انگت ءَ رھچار اِنت۔ آلم مری ءَ ھوار درسیں بیگواھیں مردم آجو کنگ بہ بنت۔
آئی ءَ گوشتگ کہ اگاں مئے زور بیگواھیں آزیزانی سر ءَ چونیں بھتامے ھست گڑا آمدگس ءَ پیش کنگ بہ بنت دانکہ کانود ءِ رد ءَ آیانی بگیری ءَ کاروائی کنگ بہ بہ بنت۔ اگاں بے میار اَنت گڑا زوتاں چہ زوت آجو کنگ بہ بنت۔
