⦿ زوریں بیگواھی چہ بلوچستان ءِ سیمسر ءَ ڈن تالان بوتگ۔
جنیوا: بلوچ راجی زرمبشت ( بی این ایم ) ءِ دری کارانی تک ءِ راھوتدار ءُ بنجاھی پتر ءِ باسک نیاز ءَ اکوام متھدہ ءِ پنجاہ ءُ ھپتمی مردمی ھکانی کونسل ءِ نیاد ءَ تران کرتگ ءُ بلوچستان ءَ مردمی ھکانی ناھکیں جاور تیوک ءَ زوریں بیگواھی ءُ درکانودی کوش ءِ سر ءَ بژنیگیں کساسے ءَ دلگوش داتگ۔
وتی تران ءَ نیاز ءَ ایران ءِ شھر کرمان ءَ پاکستانی لشکر ءِ دست ءَ یک شرپمندیں بلوچ سروک استاد واھد کمبر ءِ انوگیں آوارجنی ءِ باروا دلگوش داتگ۔ آئی ءَ گوں کونسل ءَ لوٹ کرتگ کہ آ استاد واھد کمبر ءَ ھوار پہ زور بیگواھیں مردمانی آجوئی ءَ زوت کاروائی بہ کن اَنت۔
نیاز ءَ پہ مردمی ھکاں کارکنوکیں گل پانک ءِ ھیرانیگیں کچ ءُکساس پیش کرتگ ، ایشی ءَ گوشتگ کہ تیوک ءَ مئی 2024 ءَ 90 مردم زور بیگواہ کنگ بوتگ، چوش کہ اے سال ءِ یک ماھے ءِ زوریں بیگواھی چہ درساں گیش اِنت۔ آئی ءَ گوشتگ کہ ماہ ءَ 44 مردم زوربیگواہ کنگ بیت۔ باز براں، اگست 2024 ءَ 14 مردم درکانودی کشگ بوتگ اَنت۔ گزارش ءِ رد ءَ ھمک ماہ ءَ پنچ انچیں ویل بنت کہ آیاں گیشتر ناشرکار یءِ کاروائی ءِ نیمون ءَ کنگ بیت۔
اے جیڑہ چہ بلوچستان ءِ سیمسر ان ڈن شنگ اتگ، بلوچ کارکنانی آوارجنی ءِ ویل ھمساھگیں ڈیھاں بیت۔ 19 جولائی 2024 ءَ 74 سالی کماشیں سروک واھد بکش پنام استاد واھد کمبر آوار جنگ بوتگ۔ اے ویل ءَ میان استمانی ترس گیش کرتگ۔ تیوک ءَ آئی مزن امری ءُ ناسازیں جاندراھی ءِ جیڑہ اِنت۔
نیاز ءَ مردمی ھکانی کونسل زور داتگ کہ آ پہ اے زوراکیاں پاکستان ءَ جست بگر اَنت ءُ اے جاورانی تہ ءَ پہ دزگیر بوتگیں مردمانی زوتیں یل کنگ ءَ زور بہ دے اَنت۔
شرپمندیں مھتر مرچی من اے کونسل ءِ سر ءَ زور دیاں کہ آ بلوچستان ءَ مردمی ھکانی گیشی ءِ بگیری ءَ دلگوش بہ دے اَنت ءُ واھد کمبر ءَ ھوار درسیں مردمانی یل کنگ ءِ لوٹ ءَ بہ کن اَنت۔ آئی ءَ وتی تران ءِ ھلاسی ءَ دمگ ءَ مردمی ھکانی بگیری ءُ آزاردھی درچ ءِ پہ دارگ ءَمیان استمانی دلگوش ءُ دزمانجنی ءِ لوٹ کرتگ۔
