بلوچ آجوئی لوٹوکیں سروک ءُ بی این ایم ءِ پیشیگیں سرکماش ھلیل ءَ وتی شنگ کرتگیں درشانے ءَ گوشتگ کہ استاد واھد کمبر، بلوچ راجی زرمبشت ءِ یک نامدار ءُ کلانھیں سروکے، آئی زوریں بیگواھی سکا بژنی اِنتءُ ایرجن آں۔ اے بنداتی نہ اِنت کہ استاد واھد کمبر ریاستی زوراکیانی آماچ اِنت، 2007 ءَ پاکستانی لشکر ءَ آئی ءَ آوار جتگءُ چیریں آزارجاھاں بند کرتگ ءُ داں چاردہ ماہ ءَ گنتریں زوراکیانی نشانگ بوتگ۔ رند ءَ آئی ءِ سر ءَ دروگیں کیس جتگ ءُ زندانی کرتگ۔ دراجکشیں بندیگی ءَ ابید ریاست ءَ آئی سر ءَ ھچ وڑیں بھتام راست نہ کرتگ اَنت ءُ گڈی ءَ آمیدگس ءَ آ بے میار کرتگ۔
آئی ءَ گوشتگ بندیگی ءِ میان ءَ چہ گیشیں آزاراں استاد واھد کمبر بازیں نادراھیانی آماچ بوتگ۔ نادراھیانی زور ءُ چہ دژمن ءِ یکشلیں رندگیری ءَ آئی جنجال گیش بوتگ اَنت ۔ آ چہ وتی مزن امری ءُ نادراھیانی سوب ءَ روکپتی بلوچستان ءَ پہ درمان ءَ نشتگ۔ انگت ءَ پاکستانی کمکاراں آ چہ ھمود ءَ آوار جتگ ءُ پاکستان سرکار ءِ دست ءَ داتگ۔ اود ءَ چہ آمیدگس ءَ پیش کنگ ءَ ابید یکبرے پد ءَ بیگواہ کنگ بوتگ۔
ھلیل ءَ گوشتگ کہ پاکستان ءِ نیمگ ءَ استاد واھد کمبر ءِزوریں بیگواھی ریاستی زوراکیانی تچکیں منانک اِنت۔ میان استمانی کانود بزاں اکوام متھدہ ءِ میان استمانی مردمی ھکانی منشور ءُ زوریں بیگواھی ءِ بگیری ءَ کنونشن ھمک مردم ءِ بنیادی ھک ءِ مانزمانی ءَ دنت، اے کانود زوریں بیگواھی ءَ درکانودی لیک اتگ ءُ ایشی بگیری ءَ ترندیں گامگیج زورگ ءِ لوٹ ءَ کنت۔
آئی ءَ گوشتگ کہ ما گوں مردمی ھکانی گل ءُ ھمک باسمائیں مردمانی گون ءَ لوٹ کن ایں کہ آ پہ استاد واھد کمبر ءِ زوت ءُ پہ بے شرتیں یل کنگ ءَ توار چست بہ کن اَنت۔ اے رستری ءُ درکانودی کار ءِبگیری ءَ بے توار بوگ زوراکیانی پلہ مرزی زانگ بیت، میان استمانی تک، تیوک ءَ ھما ادارہ کہ مردمی شرپ ءِ پھازداراَنت پہ آیاں ھژدری اِنت کہ آ وتی زمہ واریاں پیلو بہ کن اَنت ءُ اے وڑیں زوراکیانی بگیری ءَ ترندیں کاروائی بہ کن اَنت۔
ھلیل ءَ گوشتگ کہ من گوں سرجمیں جھان ء ِ راجدوست ءُ مردم دوستانی گون ءَ لوٹ کن آں کہ استاد واھد کمبر ءِ وڑیں کماش ءُ نادراھیں سروکے ءِ آجوئی ءَ توار چست بہ کن اَنت۔ رسانکدر ءَ تکشام ءَ بھر بزور اَنت۔ ما سدکیں کہ وھدے ما درس یکمشت بہ ایں ءُ توار چست کن ایں گڑا میان استمانی تک اش کنت ءُ زوراکی ءِ بگیری ءَ یک مھکمیں زرمبشتے جوڑ بیت ءُ چست بیت۔
