کیچ: سالے پیش چہ تمپ ءَ پاکستانی لشکر ءِ دست ءَ آوار جنگ بوتگیں اسرار ءِ کھول ءَ گوں مردمی ھکانی گلاں توار چست کنگ ءِ لوٹ کرتگ۔
آئی ءَ گوشتگ کہ اسرار ء اتااللہ تمپ ءِ میتگ کونشکلات ءِ جاہ منند اِنت کہ پاکستانی لشکر ءَ 13 مارچ ءَ گس ءَ بیڑ برتگ ءُ آوار جتگ ءُ بیگواہ کرتگ کہ انگت ءَ بیگواہ اِنت۔ چہ آئی زوریں بیگواھی ءَ مئے سرجمیں کھول رنجانی دیمپان اِنت۔ سالے ءُ شش ماہ ءِ گوزگ ءَ پد ھم مارا انگت ءَ ھچ گوشگ نہ بوتگ کہ آ چون ءُ کج ءَ اِنت۔
کھول ءِ گوشگ اِنت کہ ما پہ اسرار ءِ آجوئی ءَ اسلام آباد ءُ تربت ءَ زھرشانیاں بھر زرتگ ءُ پہ آئی آجوئی ءَ لوٹ کرتگ، انگت ءَ پہ اسرار ءِ آجوئی ءَ ھچ وڑیں گامگیج زورگ نہ بوتگ۔
آئی ءَ گوں مردمی ھکانی گلاں لوٹ کرتگ ءُ گوشتگ کہ پہ اسرار ءِ آجوئی ءَ توار چست بہ کن اِت۔
