شال: زور بیگواھیں استاد واھد کمبر ءِ جنک مھلب ءَ شال پریس کلب ءَ پریس کانپریس کرتگ ءُ گوشتگ کہ منی پت چہ 1970 ءَ سیاسی رھشونے ءِ بستار ءَ پہ بلوچ راج ءِ ھکاں توار چست کنگ ءَ اِنت۔ بلوچستان ءَ سیاست ءُ بلوچستان ءِ سیاسی سروک اسلام آباد ءِ سرکار ءِ گون ءَ ھمگرنچ اَنت، بلے منی پت وتی راج ءِ گون ءَ وپاداری، مھر ءُ آیانی ھکی ئیں نپانی دیمپانی ءَ آئی کول ءُ مھکمی ءِ تہ ءَ ھچ وڑیں کمی نہ یتکگ۔ بلے ھمے سوب ءَ پہ پاکستان سرکار ءَ نادوستیں سیاست کنوکے بوتگ۔
آئی ءَ گوشتگ کہ چہ ریاستی ادارھاں مئے پت ءَ مدام ترس بوتگ، 14 مارچ 2007 ءَ پاکستان ءِ چیریں ادارھانی کارمنداں پولیس ءِ کمک ءَ آئی ءِ ھمبلانی ھمراھی ءَ درکانودی آوار جتگ ءُ داں چِل ءُ یک ماہ ءَ زور بیگواہ کرتگ۔ انچو ماہ ءِ آزار جاھاں بند بوگ ءَ پد چیریں ادارھاں آئی سر ءَ 12 ناشرکاری ءِ کیس جتگ ءُ پولیس سی ٹی ڈی ءِ دست ءَ داتگ، ھمے وڑ ءَ کہ آ دیم ءَ آرگ بوتگ پاکستان ءِ آمیدگس ءَ کیس کنگ بوتگ۔ منی پت 2011 ءَ مزن آمیدگس ءَ دروگ ءُ چہ بے بنیادیں کیساں آجو کرتگ۔ چہ ایشی ابید ریاستی ادارھاں پہ آئی سیاسی لیکہ ءِ بنیاد ءَ دلسیاہ کرتگ۔ پاکستانی لشکر ءَ مئے گساں بیڑ برتگ ءُ مانداشتگ اَنت ءُ گوں سلاھاں اُرش کرتگ۔ چہ ھمے جاوراں منی پت پہ چیر بوگ ءَ لاچار بوتگ ءُ آئی ءَ سک دیر اِنت کہ ھمے داب ءَ وتی زند گوازینتگ۔
مھلب ءَ گوشتگ کہ گوستگیں وھد ءَ آئی تب ھم شر نہ بوتگ ءُ سکا سانمند بوتگ، آ بازیں نادراھیانی آماچ بوتگ۔ چہ دل ءِ نادراھیانی سوب ءَ آ چہ وتی آزیزانی کمک ءَ روکپتی بلوچستان ءَ شتگ۔ اود ءَ آ پہ درمان کنگ ءَ ایران ءِ شھر کرمان ءَ برگ بوتگ، پہ درمان ءِ سوب ءَ ھمود ءَ نشتگ دانکہ ڈاکٹرانی کِر ءَ شت ءُ آتک بہ کنت۔ 19 جولائی 2024 ءَ منی پت واھد کمبر پہ سامان زورگ ءَ چہ گِس ءَ ڈن ءَ در آتکگ ءُ گسانی نزیک ءَ دکان ءَ سامان زورگ ءَ بوتگ کہ چار مردم کہ گاڑی ( پژو پارس نامیں اسپیت رنگ ءِ ایرانی گاڑی یے) ءِ سوار بوتگ اَنت آیاں پہ زور منی پت گاڑی ءَ سوار کنگ ءِ جھد کرتگ۔ پہ آئی پھریزگ ءَ نزیکیں دکاندار گِر ءُ چیل بوتگ بلے آئی ءَ گوں بیھار ءَ دور اِش کرتگ ءُ آوار جتگ ءُ برتگ۔ چی ءَ کہ آ اود ءَ درآمدے بوتگ پمیشکا ھندی مردم اے ویل ءِ چم دیستیں گواہ اَنت بلے اے جاور ءَ سرپد بوت نہ کن اَنت کہ زوت آئی گِس ءَ سھی بہ کن اَنت ءُ درسیں جاوراں بہ گوش اَنت۔ اود ءَ دوزواھاں چہ جتائیں بنشوناں جست کرتگ ءُ آئی پٹ ءُ پول کنگ ءِ جھد کرتگ آئی ھچ وڑیں ھال نہ رستگ۔ پمیشکا مردم اے گپ ءَ پکا گوش ایت کہ آئی ءَ پاکستان ءِ چیریں ادارھانی کارمنداں چہ وتی کمکارانی کمک ءَ آوار جتگ ءُ پاکستان ءَ دیم داتگ ءُ آ چیریں آزار جاھے ءَ بند اِنت۔ چہ چم دیستیں مردمانی گپ، ویل ءِ منانک ءُ استاد واھد کمبر ءِ کرد ءَ ھمے پدر بیت کہ ریاست پاکستان ءِ ادارھاں آوار جنگ ءَ پد بیگواہ کرتگ۔
آئی ءَ گوشتگ کہ چہ پت ءِ چیر بوگ ءِ سوب ءَ ما گوستگیں ھبدہ سال اِنت کہ آئی جتائی اوپار کرتگ آ دل ءِ نادراھے بوتگ۔ گوستگیں وھد ءَ آئی دل ءِ برُبین بوتگ کہ روچے آئی ءَ چنچو بر ءَ درمان ورگی اِنت۔ ڈاکٹر ءَ گوں ترندی ءَ گوشتگ کہ لھتے انچیں درمان اَنت آ مدام ورگی اَنت ھمے گم گوشتگ کہ تیوک ءَ لھتے شرکتانی درمان اَنت ھمایانی وھد پیلو کنگی اِنت اگاں نہ بوت اَنت پہ آئی جانردائی ءَ ترس ھست۔
مھلب ءَ گوشتگ کہ ھمے جست اِنت کہ آ چی ءَ آوار جنگ بوتگ اے جست ءِ پسو ءَ ھما آوار جنوک دات کن اَنت، مئے پھم ءُ ترس ھمے گپ ءَ گوش ایت کہ پاکستان سرکار پہ بلوچ راجی زرمبشت ءِ دارگ ءَ آیاں کارمرز کنگ لوٹ اِیت۔ گوست ءَ ھم دزگیری ءِ میان ءَ آ چنچو آزار دیگ بوتگ اَت آئی ءَ ھمے زور داتگ اَت کہ آ پریس کانپریس مہ کنت ءُ وتی زوراکیانی باروا گپ مہ کنت۔ بلے آئی ءَ اے گپ نہ منّ اتگ، بلے انوں ھم آئی ءَ چہ جانی ءُ سسائی آزاراں لاچار کن اَنت ءُ پہ دروگیں گپے ءَ دیم ءَ آرگ لوٹگ ءَ اَنت۔ انچو وھد اِنت کہ آ پاکستان ءِ زندان ءَ اِنت بلکیں ھمک روچ آزار دیگ بیت۔
آئی ءَ گوں اھوالکاراں دلگوش گور کرتگ ءُ گوشتگ کہ مئے شمئے پارست ءَ ھمے گپ ءَ یاداشت کنگ لوٹ آں کہ بلکیں پہ آئی نزور کنگ ءَ کھول ءَ تاوان دیگ ءِ جھد ءَ بہ کن اَنت یا گوں سسائی سلاھانی پارست ءَ کارمرز کنگ ءُ وتی سیاسی چہ لیکہ ءَ دست جش بوگ یا دگہ پہ درشانے ءِ دیگ ءَ لاچار بہ کن اَنت، بلے ایشی ھچ وڑ ءَ نہ من ایں۔ منی پت واھد کمبر ءَ چے بوت ایشی زمہ وار ریاست پاکستان ءُ آئی لشکری ادارہ اَنت۔ ما تچکی ءَ گوش ایں کہ کھول آئی زوریں بیگواھی ءَ ھچ وڑ ءَ بے توار نہ بیت۔ ما ھما درسیں بنشوناں کارمرز کن ایں کہ آئی ءَ آجو کنگ ءِ اوست بہ بیت۔ ما گوں مردمی ھکانی درسیں ادارہ ءُ بلوچ راج ءِ گون ءَ لوٹ کن ایں کہ آ اے جھد ءَ مئے گون ءَ کمک بہ کن اَنت ءُ توار چست بہ کن اَنت۔
ملب ءَ گوشتگ کہ اے پریس کانپریس ءِ مول سرکار ءَ کلوہ دیگ اِنت کہ دیگ اِت کہ وتی زمہ واریاں بزانت ءُ استاد واھد کمبر ءَ زور آجو بہ کناھین ایت۔ دروگیں کیساں پاکستان ءِ آمیدگس ءَ آ آجو کرتگ اَت۔ مئے زانشت ءِ بنیاد ءَ آئی سر ءَ چوشیں ھچ بھتام نیست کہ آئی بنیاد ءَ زندانی کنگ بہ بیت، آئی ءَ چہ درمان کنگ ءِ میان ءَ دراں ڈیھ ءَ آوار جتگ ءُ بیگواہ کرتگ۔
