کلات: شھید اجاز ءِ کھول ءِ نیمگ ءَ آئی شھیدی ءِ اولی سالروچ ءِ درگت ءَ دیوانے برجم دارگ بوتگ۔ دیوان ءَ نودربر، سول سوسائٹی ءِ سروک ءُ ھندی مردماں بازیں کچے ءَ بھر زرتگ ءُ شھید ستک شانی ندر کرتگ۔ دیوان ءَ کران وانی ھم بوتگ۔
دیوان ءَ شھید اجاز ءِ گھار ءَ تران کرتگ ءُ گوشتگ کہ من اے گپ ءَ پھر بنداں من شھیدے ءِ کھول ءِ مردماں منی برات اجاز ءِ وڑیں ورنایاں ھمک روچ وھد ءِ بنامیں سی ٹی ڈی ءُ پاکستانی لشکر دروگیں میڑاں شھید کنگ ءُ آیانی لاشاں جنگلاں چگل دیگ ءَ اَنت۔ رند ءَ آیانی سر ءَ دروگیں گپ جنگ ءُ دیم پہ دیمی میڑ ءَ شھیدی ءَ پدر کنگ ءَ اَنت۔
آئی ءَ گوشتگ کہ شھیداں وتی جانانی دیمونی داتگ نوں آیانی جھد ءِ دیمءَ برگ مئے ءُ شمے سر ءَ پرز بیت۔ مارا ھمک مردمءَ راجی جھد ءِ تہ ءَ وتی پرز پیلو کنگ لوٹ ایت۔
گڈی ءَ شھید اجاز ءِ کھول ءُ آدگہ مردماں آئی مانش ءَ سر ءَ چادر تالان کرتگ ءُ پل شانتگ۔
یات بہ بہ اِت کہ 24 اگست 2023 ءِ شپ ءَ پاکستانی لشکر ءُ کلات ءِ ھند منگچر ءَ میر اھمد ءِ گس ءَ بیڑ برتگ ءُ جنین ءُ زھگانی ھواری ءَ گوں مردماں زوراکی کرتگ ءُ اجاز اھمد گوں وت برتگ، ماھے ءَ پد آئی ھزدار ءَ ھند کھٹان ءَ دروگیں میڑے ءَ شھید کرتگ۔
