شال: چہ بیگواھیں بلوچانی توار ( وی بی ایم پی ) ءِ زھرشانی گدان ءَ زور بیگواھیں مھرگل مری ءِ گھار ءَ پریس کانپریس کرتگ ءُ گوشتگ کہ منی برات مھر گل مری ءَ چہ مرچی نو سال پیش پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ کہ انگت بیگواہ اِنت۔
آئی ءَ گوشتگ کہ ما آئی زوریں بیگواھی ءِ بگیری ءَ کیس کرتگ ءُ آمیدگس ءَ پرمان داتگ کہ ایم آئی ءُ پاکستانی لشکر زوتاں چہ زوت مھر گل مری ءَ آجو بہ کن اَنت، بلے بد بھتی ءَ آمیدگس ءِ پرمان گوات ءَ برتگ ءُ انگت ءَ منی برات ءِ ھچ وڑیں ھال نیست۔
آئی ءَ گوشتگ کہ منی برات ءِ کار کشت ءُ کشاری بھرگ ءِ ھژدہ گریڈ ءِ سروگانے اِنت ءُ آ ڈیرہ بگٹی ءَ وتی پرز ءِ پیلو کنگ ءَ بوتگ، ما پہ وتی برات ءِ آجوئی ءَ ھمک در ٹک اِتگ۔ ما ریڈ زون ءَ ھورانی میان ءَ داں چل روچ ءَ پہ وتی آزیزانی آجوئی ءَ نندانک ءَ نشتگ ایں، انگت ءَ آئی باروا ھچ وڑیں ھال نیست۔ ما دوبر ءَ اسلام آباد ءَ زھرشانی نندانکاں بھر زرتگ بلے بے اوستی ءَ ابید دگہ ھچ نہ رستگ۔
آئی ءَ گوشتگ کہ من درسیں لشکری ادارہ، تیوک ءَ گوں ڈی جی ایم آئی ءُ ڈی جی آئی ایس آئی ءُ آرمی چیپ ءَ لوٹ کن آں کہ منی برات ءَ آجو بہ کن اَنت ءُ مارا چہ اے دراجکشیں اندوھاں بہ رکین اَنت۔
