بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں زی کلات ءَ زورگریں پاکستانی لشکر ءِ یک لشکری ٹرکے گوں چیر کرتگیں شورھاں نشانگ کرتگ، ایشی آسر ءَ چار دژمنیں کارمند جاھی مرتگ ءُ دہ ٹپی بوتگ۔
آئی گوشتگ کہ کلات ءِ ھند نرمک، تکت ءَ بی ایل اے ءِ سرمچاراں زورگریں پاکستانی لشکر ءِ یک ٹرک گاڑی یے گوں چیرکرتگیں شورھاں نشانگ کرتگ۔ تراک ءِ آسر ءَ گاڑی تباہ بوتگ ءُ ایشی سواریں چار کارمند جاھی مرتگ ءُ کم چہ کم دہ ٹپی بوتگ اَنت، آیانی تہ ءَ سکا ٹپیگیں کارمند ھوار اَنت۔
جارکش ءَ گوشتگ کہ سرمچاراں دژمنیں لشکر ھما وھد ءَ نشانگ کرتگ کہ آ ھمے ھند ءَ لشکری زوراکیانی نیت ءَ گوں باز گاڑیانی کاروان ءَ ترّ ءُ گرد کنگ ءَ بوتگ۔ اُرش ءَ تاوان بوتگیں دژمن ءَ جتائیں نیمگاں بازیں مارٹر ءِ گولا آس داتگ ءُ وتی ترس پیش داشتگ ءُ لس آبادیانی جان ءُ مال ترس ءِ تہ ءَ بوتگ اَنت۔
جیھند ءَ وتی درشان ءِ گڈی ءَ گوشتگ کہ مئے گل بی ایل اے اُرش ءِ زمہ واری ءَ منّ ایت۔
