ھیبرپکتونواہ: لکی مروت ءَ پاکستانی لشکر ءِ بگیری ءَ پولیس کارمندانی زھرشا نی نندانک ءَ چار روچ اِنت برجاہ اِنت۔ چہ لکی مروت ءَ پد بنوں ءُ باجوڑ ءَ پولیس کارمندانی نیمگ ءَ زھرشانیانی درچ بندات کنگ بوتگ۔ اے سے ئیں دمگاں پولیس کارمند پہ وتی ھمبلیں کارمندانی نشانگ کنگ ءُ ارشاں مرگ ءِ بگیری ءَ زھرشانی کنگ ءَ اَنت۔
لکی مروت ءُ باجوڑ ءَ زھرشانی کنوکیں پولیس کارمنداں لوٹ کرتگ ءُ گوشتگ کہ اے ھنداں پاکستانی لشکر دارگ بہ بیت ءُ پولیس ءَ پد ءَ ھما واک دیگ بہ بنت۔ وھدیکہ بنوں ءَ زھرشانی کنوکیں پولیس کارمنداں پھازداری ءِ لوٹ کرتگ۔
ھیبرپکتوانواہ ءَ پولیس کارمندانی درساں مستریں زھرشانی نندانک لکی مروت ءَ گوستگیں چار روچ اِنت کہ برجاہ اِنت ءُ پنچ شمبے ءِ روچ ءَ ھندی باپاری پتر ءَ تھتگ بند ھرتال کرتگ ءُ زھرشانی ءَ ھوار بوتگ اَنت۔
بنوں پولیس کارمندانی نیمگ ءَ بوتگیں زھرشانی ءِ باروا بنوں پولیس ءِ جارکش بشیر اھمد ءَ گوشتگ کہ کارمنداں پولیس لائن ءِ ڈن ءَ ھما وھد ءَ زھرشانی بندات کرتگ کہ پولیس کارمند نور آالم ھان ڈومیل پولیس گس ءِ نزیک ءَ نشانگ کنگ بوتگ۔
آئی ءَ گوشتگ کہ پولیس کارمندانی گوشگ اِنت ھمک روچ پولیس کارمند نشانگ کنگ بوگ ءَ اَنت ءُ ما اے جاوراں اوپار کرت نہ کن ایں۔
پولیس ءِ جارکش ءَ لوٹ کرتگ ءُ گوشتگ کہ کشگ بوتگیں پولیس کارمند ءِ کشندہ دزگیر کنگ بہ بنت۔
