بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مستونگ ءَ سے جتائیں ارشاں لشکر کشی ءَ ھواریں زورگریں لشکر ءِ ٹولی ءُ مزنیں بنجل نشانگ کرتگ اَنت۔
آئی ءَ گوشتگ کہ بی ایل اے ءِ سرمچاراں دوشی مستونگ ءِ ھند اسپلنجی ءَ برجاھیں زورگریں پاکستانی لشکر ءِ مزنیں بنجل نشانگ کرتگ۔ سرمچاراں دژمن ءِ سر ءَ راکٹ لانچر ءِ باز گولا آس داتگ ءُ گوں مزنیں سلاھاں ارش کرتگ۔ ارش ءَ یک دژمنیں کارمندے جاھی مرتگ ءُ کم چہ کم چار ٹپی بوتگ۔
جارکش ءَ گوشتگ کہ بی ایل اے ءِ سرمچاراں سے شمبے ءِ روچ ءَ مستونگ ءِ ھند اسپلنجی ءَ زورگریں پاکستانی لشکر ءِ کارمند ھما وھد ءَ گوں چیرکرتگیں شورھاں نشانگ کرتگ اَنت کہ آ ھمے ھند ءَ لشکرکشی ءِ ارادہ ءَ تر ءُ گرد کنگ ءَ بوتگ اَنت۔ تراک ءِ آسر ءَ زورگریں لشکر ءِ دو پیادگیں کارمند ٹپی بوتگ۔
آئی ءَ گوشتگ کہ ھمے وڑ ءَ بی ایل اے ءِ سرمچاراں سے شمبے ءِ شپ ءَ مستونگ شھر ءَ برجاھیں پاکستانی لشکر ءِ مزنیں بنجل ءِ پھازداریں پانگسانی سر ءَ گرنیڈ لانچر ءِ باز گولا آس داتگ، تراکانی آسر ءَ کم چہ کم سے دژمنیں کارمند ٹپی بوتگ اَنت۔
بی ایل اے ءِ جارکش جیھند گڈی ءَ گوشتگ کہ اے ارشانی زمہ واری ءَ مئے گل بی ایل اے من ایت۔
