بلوچ یکجھتی کمیٹی ءِ سروک ڈاکٹر ماہ رنگ ءَ ماں چارگردی رسانکدر ایکس ءَ نبشتگ کہ بلوچستان سرکار لشکری اسٹیبلشمنٹ ءِ گوشگ ءِ پد ءَ ھزارانی کچ ءَ نام پورتھ شیڈول ءَ ھوار کرتگ ءُ مزنیں کساسے ءَ زوراکی کنگ ءَ اَنت۔
آئی ءَ گوشتگ کہ تیوک ءَ شال ءَ جولائی ءَ 137 مردم پورتھ شیڈول ءَ ھوار کنگ بوتگ اَنت، آیانی تہ ءَ نودربر، نبشتہ کار، لیکچرار ءُ پروپیسر ھوار اَنت۔
بی وائی سی ءِ سروک ءَ گوشتگ کہ سرکار ءِ نیمگ ءَ شنگ بوتگیں لڑا منی برات ناسر ءِ نام ھوار اِنت کہ آ ایشی پیشزوریں بیگواھی ءِ آماچ بوتگ ءُ آ اے وھد ءَ گوں ھچ وڑیں سیاسی پرکاریاں ھمگرنچ نہ اِنت۔ پرایمنیں شھری بہ بنت یا کارکن آیانی کھولانی نام ءَ ناشری ءِ واچ لڑ ءَ ھوار کنگ بلوچستان ءَ بلوچانی بگیری ءَ زوراکی ءِ یک مزنیں تکشامے بھر اِنت۔
آئی ءَ گوشتگ کہ سرکار بلوچستان ءَ یکبرے پد ءَ مزنیں کچے ءَ گوں دزگیری بنجلے ءَ مٹ کنگ ءَ اِنت۔ انچوش کہ چین ءِ نیمگ ءَ سنکیانگ ءِ آئی وتی وتکواکیں ھندانی جاور اَنت کہ آیان ءَ گوں زندان ءَ مٹ کرتگ، اے وڑیں کارپدانی مول ریاستی زوراکیانی تیز کنگ ءُ ھکانی توار ءِ دارگ ءِ جھد اِنت۔
ڈاکٹر ماہ رنگ ءَ گوشتگ کہ بلوچ یک اے وڑیں چونیں ھم کارپدے ءِ بگیری ءَ گھگیری کنت۔ من گوں سول سوسائٹی، رسانکدر، مردمی ھکانی میان استمانی گل ءُ سیاسی کارکنانی گون ءَ کانود ءِ اے وڑ ءَ رد کارمرز کنگ ءِ بگیری ءَ توار چست کنگ ءِ لوٹ ءَ کن آں۔
