شال: سوراب ءِ جاہ منند زور بیگواھیں سیپ اللہ رودینی ءِ گھار پرزانہ رودینی ءَ پہ وتی برات ءِ آجوئی ءَ لوٹ کرتگ ءُ گوشتگ کہ منی برات سیپ اللہ رودینی پولیس کارمندے ءُ آ 22 نومبر 2013 ءَ چہ سوراب ءَ دیم پہ ھزدار ءَ وتی کار ءِ سر ءَ روگ ءَ بوتگ کہ بیگواہ کنگ بوتگ انگت بیگواہ اِنت۔ بلوچستان پولیس ءَ پہ آئی آجوئی ءَ گامگیج زورگ ءَ ابید چہ نوکری ءَ ماٹو کرتگ ءُ آئی پگار ھم داشتگ۔ چہ ایشی مئے کھول سکا مالی جنجالانی دیمپان اِنت۔
آئی ءَ گوشتگ کہ سیپ اللہ مئے کھول ءِ والینوک بوتگ ءُ چہ آئی زوریں بیگواھی ءَ پد ما مالی جنجالانی دیمپان ایں ءُ اے یک مچی یے سزا یے ءِ دروشم ءَ اِنت۔
پرزانہ ءَ گوں مزن آمیدگس، بلوچستان ءِ آئی جی پولیس ءُ مردمی ھکانی گلانی گون ءَ لوٹ کرتگ کہ آ سیپ اللہ رودینی ءِ پگار ءَ پچ بہ کن اَنت ءُ پہ آئی آجوئی ءَ گامگیج بزور اَنت، دانکہ ما چہ اے رنجاں آجو بہ بہ ایں۔
