بلوچ آجوئی لوٹوکیں سروک ءُ بی این ایم ءِ پیشیگیں سرکماش ھلیل ءَ ماں رسا نکدر ءَ وتی شنگ کرتگیں درشانے ءَ گوشتگ کہ بلوچ راجی زرمبشت ءِ کلانھیں سروک استاد واھد کمبر ءِ زوریں بیگواھی سکا بژنی گپے۔ استاد واھد کمبر چہ ایشی پیش زوریں بیگواھی ءِ آماچ بوتگ، 2007 ءَ پاکستانی لشکر ءَ استاد واھد کمبر آوار جتگ ءُ داں چاردہ ماہ ءَ چیریں آزار جاھاں آزارانی نشانگ کرتگ۔ چہ ایشی پد بے بنیں بھتام جتگ کہ ایشی آسر ءَ دزگیر کنگ بوتگ آ داں لھتے ماہ ءَ زندانی کنگ بوتگ۔ ریاست وتی آمیدگس ءَ آئی بگیری ءَ بھتامانی راست کنگ ءَ بے سوب بوتگ۔ گڈی ءَ پہ یل کنگ ءَ لاچار بوتگ، بلے اے کماشیں سروک ءِ سرءَ زوراکیانی درچ برجاہ اِنت۔
آئی ءَ گوشتگ کہ استاد واھد کمبرھما وھد ءَ پاکستان ءِ آزار جاھاں جتائیں نادراھیانی آماچ بوتگ۔ پیری ءُ چہ وتی نادراھیانی درمان کنگ ءِ سوب ءَ آ چنچو سال اِنت کہ روکپتی بلوچستان ءَ بوتگ۔ اود ءَ پاکستان ءِ کمکاراں آوار جتگ ءُ پاکستان ءِ دست ءَ داتگ۔ پد ءَ ھم ریاست چہ وتی آمیدگس ءَ پیش کنگ ءَ ابید یکبرے پد ءَ زوریں بیگواھی ءِ آماچ کرتگ۔
ھلیل بلوچ ءَ گوشتگ کہ پاکستان ءِ دست ءَ استاد واھد کمبر ءِ زوریں بیگواھی ریاستی زوراکیانی پدریں منانکے۔ میان استمانی کانود بزاں اکوام متھدہ ءِ مردمی ھکانی میان استمانی جار ءُ زوریں بیگواھی ءِ بگیری ءَ کنونشن ھمک مردم ءِ بنیادی ھکانی مانزمانی ءَ دنت۔ اے کانود تچکی ءَ زوریں بیگواھیاں درکانودی لیک ایت ءُ ھمیشی وڑ ءُ پیمانی بگیری ءَ کاروائی ءِ لوٹ ءِ سر ءَ زور دے ایں۔
راجدوستیں سروک ءَ گوں میان استمانی تک، مردمی ھکانی گل ءُ گوں درسیں باسمائیں مردماں لوٹ کرتگ ءُ گوشتگ کہ پہ استاد واھد کمبر ءِ زوتیں یل کنگءَ توار چست بہ کن اَنت۔ بلوچ چاگردءِ تہ ءَ آئی مزن امری ءُ بے مٹیں شرپ ءَ ابید پہ آئی جان ءَ ترس ودی کنگ ءُ آئی ءَ زوراکیانی نشانگ کنگ مردمی ھکانی ناھکیں بگیری اِنت۔ مارا مچی ءِ پارست ءَ وتی توار چست کنگ سکا ھژدری اِنت۔ مارا میان استمانی تک بزاں میان استمانی ادارھاں یات ءَ گیجگی اِنت کہ آیان ءَ واک ءُ مردمی شرپ برجاہ دار دارگ ءُ مردمی ھک پھریزگ لوٹ اَنت۔ اے سدکی دیگ ھژری اِنت کہ میان استمانی زرد ناھکیانی بگیری ءَ زندگ بہ بیت ءُ اے وڑیں زوراکیانی بگیری ءَ ترندیں کاروئی بہ کنت۔
