شال: یک شمبے ءِ روچ ءَ ھشت سال پیش زورگریں پاکستانی لشکر ءِ دست ءَ زور بیگواہ کنگ بوتگیں جھانزیب ءِ کھول ءِ نیمگ ءَ پہ آئی یل نہ کنگ ءِ بگیری ءَ زھرشانی روانکے کشگ بوتگ۔
زھرشانی ءَ وی بی ایم پی، بی وائی سی ءِ سروک ءُ باسکانی ھواری ءَ نودربر ءُ زور بیگواھیں مردمانی کھول ءُ لس مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس، بینرز، پلے کارڈ گوں بوتگ اَنت کہ آیاں شھر ءِ جتائیں دگاں ترّر ءُ گرد کرتگ ءُ زوریں بیگواھیانی بگیری ءَ اوگام جتگ۔
زھرشانی ءِ میان ءَ تران کنان ءَ زور بیگواھیں جھانزیب ءِ کھول ءَ گوشتگ کہ جھانزیب شال ءِ ھند سریاب دگ ءِ جاہ منند اِنت ءُ یک دزری یے۔ آئی سور کرتگ ءُ آئی یک جنکے ھست، آئی جنک زھرشانیاں بھر زورگ ءَ اِنت۔
آئی ءَ گوشتگ کہ جھانزیب 3 مئی 2016 ءَ چہ شال ءَ زور بیگواہ کنگ بوتگ کہ انگت ءَ بیگواہ اِنت۔ ما ھمے لوٹ ءَ کن ایں کہ جھانزیب ءَ ھوار درسیں زور بیگواھیں مردم یل کنگ بہ بنت۔
مات ءِ گوشگ اِنت کہ ماسومہ جھانزیب ءِ یکیں جنک اِنت ھما وھد ءَ کہ جھازیب بیگواہ کنگ بوتگ گڑا آئی جنک ءِ امر شش ماہ بوتگ۔
