کراچی: بیگواھیں بلوچانی توار ( وی بی این پی ) ءِ کارگشاد سمی دین مسکت ءَ روگ ءَ بوتگ کہ کراچی بالی پٹ ءِ واکدار ءَ داشتگ ءُ روگ ءَ نہ اشتگ۔
اے باروا سمی دین ءَ ماں چاگردی رسانکدر ایکس ءَ نبشتگ کہ من ءَ کراچی بالی پٹ ءَ پہ مسکت ءَ روگ ءَ امیگزیشن ءِ واکدار ءَ داشتگ، من ءَ ایپ آئی اے ءِ واکدار ءَ گوشتگ کہ منی نام بلوچستان سرکار ءِ نیمگ ءَ ایگزٹ کنٹرول لسٹ یا ای سی ایل ءَ ھوار کنگ بوتگ۔
آئی ءَ گوشتگ کہ من ءَ ھچ وڑیں نبشتھی دروشم ءَ گوشگ نہ بوتگ، من ءَ گوستگیں چار دار اِنت کہ یک کوٹی یے ءَ نندارینتگ ءُ ترّ ءُ گرد ءِ سر ءَ پابندی جتگ۔
سمی دین ءَ گوشتگ کہ نہ منی پاسپورٹ ءَ من ءَ دیگ ءَ اَنت ءُ نہ من ءَ ھچ وڑیں نبشتھی منانکے دیگ ءَ اِنت۔ چہ ایشی ھمے پدر بیت کہ بلوچستان سرکار ءِ گوشگ ءِ پد ءَ منی نام ای سی ایل ءَ ھوار کنگ بوتگ۔
